கோவை வனச்சரகம் மற்றும் போளுவாம்பட்டி வனச்சரகத்தின் எல்லைப்பகுதியான அட்டுக்கல் பெரும்பள்ளம், வனப்பகுதியை ஒட்டியுள்ளது. இப்பகுதியில், நாள்தோறும், மாலை மற்றும் இரவு நேரங்களில், காட்டு யானைகள் வெளியேறி, அதிகாலையில் மீண்டும் வனப்பகுதிக்குள் செல்வது வழக்கமாகும்.

இந்நிலையில், நேற்று மாலை, 4:00 மணிக்கு, 7 யானைகள் கொண்ட கூட்டம், அட்டுக்கல் பெரும்பள்ளம் பகுதியில் முகாமிட்டது. சுமார், 2 மணி நேரத்திற்கும் மேலாக, ஒரே இடத்தில் காட்டு யானைகள் கூட்டம் முகாமிட்ட தகவல் பரவியதும், யானைகளை பார்க்க பொதுமக்கள் திரண்டனர்.

தகவலறிந்து வந்த வனத்துறையினர், காட்டு யானைகளை விரட்ட முயன்றனர். இருப்பினும், இரவு 7:00 மணிக்கு பின்பே, யானைகள் கூட்டம் மெல்ல நகர்ந்து, குப்பேபாளையம், மண்குட்டு பகுதி அருகே சென்றது. அங்கிருந்து, இரவு 9:00 மணி வரை, யானைகள் அங்கும் இங்கும் என நகர்ந்து சென்றது. இருப்பினும், வனப்பகுதிக்குள் செல்லவில்லை. இரவு முழுவதும் காட்டு யானைகளை வனப்பகுதிக்குள் விரட்டும் பணியில், வனத்துறையினர் ஈடுபட்டனர்.