செல்வபுரம் தெலுங்கு பாளையம் பிரிவில் உள்ள, குஜான் ஆருத்ரா அபார்ட்மென்ட்டில், நேற்று நடந்த கோலப்போட்டியில், 17 மகளிர் பங்கேற்று, புள்ளிக்கோலம் மற்றும் ரங்கோலி கோலங்களை வரைந்து பரிசுகளை வென்றனர்.

இதில் முதல் பரிசு தேஜூ, இரண்டாம் பரிசு பிரியங்கா, மூன்றாம் பரிசு ரத்தின பிரபா ஆகியோர் வென்றனர். சிறப்பு பரிசு தேவ் விநாயக், உஷாராணி ஆகியோருக்கு வழங்கப்பட்டது.

வாசகி சித்ரா வெங்கடேசன் கூறுகையில், ''தினமலர் கோலப்போட்டியில் பங்கேற்க வேண்டும் என்று எனக்கு ரொம்ப நாள் ஆசை. அது இப்போது நிறைவேற்றி உள்ளது. ரங்கோலிதான் எனக்கு பிடிக்கும். வீட்டில் புள்ளி கோலம் போட்டாலும், அதிலும் கலர் மிக்ஸ் பண்ணி போடுவேன். காலங்கள் மாறினாலும், கோலம் போடும் பண்பாடு நம் பெண்களிடம் மாறாது,'' என்றார்.

அபார்ட்மென்ட் அசோசியேஷன் தலைவர் வாசுதேவன் கூறுகையில், ''நான் 40 ஆண்டுகளாக தினமலர் வாசகன். தினமலர் கோலப்போட்டியில் பங்கேற்க, எங்கள் அபார்ட்மென்டில் உள்ள பெண்கள் ஆர்வமாக இருந்தனர். வாசலில் கோலம் போடுவது, நம் பண்பாட்டின் ஓர் அங்கம். இந்த போட்டியின் வழியாக, இளைய தலைமுறை பெண்கள் மத்தியில் இந்த கலாசாரம் வளரும் என்ற நம்பிக்கை ஏற்பட்டுள்ளது,'' என்றார்.

அசோசியேஷன் செயலாளர் பாலமூர்த்தி குப்தா கூறுகையில், ''கிராமங்களில் இருந்து நகரங்களுக்கு வந்து அடுக்குமாடி குடியிருப்பில் வாழ்ந்தாலும், நம் பண்பாடு, கலாசாரத்தை மறக்கக் கூடாது என்பதை, தினமலர் கோலப்போட்டி பெண்களுக்கு நினைவுபடுத்தும் விதமாக உள்ளது. எங்கள் அபார்ட்மென்ட்வாசிகள் எல்லோருக்கும் இதில் சந்தோஷம்'' என்றார்.