பாரதியார் பல்கலைக்கு உட்பட்ட கல்லுாரிகளுக்கு இடையே, ஆண்களுக்கான பேட்மின்டன் போட்டிகள், பி.எஸ்.ஜி., கலை அறிவியல் கல்லுாரியில் கடந்த மூன்று நாட்கள் நடந்தன. இப்போட்டியில், 28 அணிகள் பங்கேற்ற நிலையில், காலிறுதி வரை 'நாக் அவுட்' முறையில் போட்டிகள் நடந்தன.

தொடர்ந்து, அரையிறுதி போட்டிகள் 'லீக்' முறையில் இடம்பெற்றன. முதல் போட்டியில் பி.எஸ்.ஜி., கலை அறிவியல் கல்லுாரி அணி, 3-0 என்ற செட் கணக்கில் கே.பி.ஆர்., கலை அறிவியல் கல்லுாரி அணியையும், இரண்டாம் போட்டியில் ஸ்ரீ ராமகிருஷ்ணா கல்லுாரி அணி, 3-0 என்ற செட் கணக்கில், இந்துஸ்தான் கல்லுாரி அணியையும் வென்றன.

தொடர்ந்து, கே.பி.ஆர்., கல்லுாரி அணி, 3-2 என்ற செட் கணக்கில் ஸ்ரீ ராமகிருஷ்ணா கல்லுாரி அணியையும், பி.எஸ்.ஜி., கல்லுாரி அணி, 3-0 என்ற செட் கணக்கில் இந்துஸ்தான் கல்லுாரி அணியையும், கே.பி.ஆர்., கல்லுாரி அணி, 3-0 என்ற செட் கணக்கில் இந்துஸ்தான் கல்லுாரி அணியையும், பி.எஸ்.ஜி., கல்லுாரி அணி, 3-1 என்ற செட் கணக்கில் ஸ்ரீ ராமகிருஷ்ணா கல்லுாரி அணியையும் வென்றன.

ஆறு போட்டிகளின் நிறைவில், முதலிடத்தை பி.எஸ்.ஜி., கல்லுாரி அணி தட்டி சென்றது. இரண்டாம் இடத்தை கே.பி.ஆர்., கல்லுாரியும், மூன்றாம் இடத்தை ஸ்ரீ ராமகிருஷ்ணா கல்லுாரி அணியும், நான்காம் இடத்தை இந்துஸ்தான் கல்லுாரி அணியும் பிடித்தன.

வெற்றி பெற்றவர்களுக்கு, பி.எஸ்.ஜி., கலை அறிவியல் கல்லுாரி செயலாளர் கண்ணய்யன், முதல்வர் பிருந்தா, பாரதியார் பல்கலை உடற்கல்வி இயக்குனர் ராஜேஸ்வரன் ஆகியோர் கோப்பை மற்றும் சான்றிதழ்கள் வழங்கினர்.