அண்ணா பல்கலைக்கு உட்பட்ட கல்லுாரிகளுக்கு இடையே(11வது மண்டலம்) ஆண்களுக்கான ஹாக்கி போட்டிகள் குமரகுரு தொழில்நுட்ப கல்லுாரியில் இரு நாட்கள் நடந்தது. இதில், ஏழு கல்லுாரி அணிகள் பங்கேற்றன.

முதல் போட்டியில், பி.பி.ஜி., கல்லுாரி அணி, 3-0 என்ற கோல் கணக்கில் எஸ்.என்.எஸ்., ஐ.டி., அணியை வென்றது. தொடர்ந்து, யு.ஐ.டி., கல்லுாரி அணி, 5-0 என்ற கோல் கணக்கில் எஸ்.என்.எஸ்., இன்ஜி., கல்லுாரி அணியையும் வீழ்த்தியது.

அரசு தொழில்நுட்ப கல்லுாரி அணி, 3-1 என்ற கோல் கணக்கில் அண்ணா பல்கலை மண்டல மையம் அணியை வென்றது. பல்வேறு போட்டிகளை அடுத்து நடந்த முதல் அரையிறுதியில், பி.பி.ஜி., கல்லுாரி அணி, யு.ஐ.டி., கல்லுாரி அணியை, 1-0 என்ற கோல் கணக்கில் வென்று இறுதிப்போட்டிக்கு தகுதிபெற்றது.

இரண்டாம் அரையிறுதியில், குமரகுரு தொழில்நுட்ப கல்லுாரி அணி, 3-0 என்ற கோல் கணக்கில் அரசு தொழில்நுட்ப கல்லுாரி அணியை வென்றது. பரபரப்பான இறுதிப்போட்டியில், பி.பி.ஜி., கல்லுாரி அணியும், குமரகுரு தொழில்நுட்ப கல்லுாரி அணியும் மோதின.

இதில், 4-3 என்ற கோல் கணக்கில் பி.பி.ஜி., கல்லுாரி அணி வெற்றி பெற்றது. யு.ஐ.டி., கல்லுாரி அணி, 3-0 என்ற கோல் கணக்கில் அரசு தொழில்நுட்ப கல்லுாரி அணியை வீழ்த்தி மூன்றாம் இடம் பிடித்தது. வெற்றி பெற்ற அணிகளுக்கு, குமரகுரு கல்லுாரி முதல்வர் எழிலரசி, உடற்கல்வி இயக்குனர் நிர்மலா தேவி ஆகியோர் பரிசுகள் வழங்கினர்.