திருநெல்வேலி மாவட்டம், அம்மாவாசை வீதியை சேர்ந்தவர் பாலமுருகன், 34; கட்டட தொழிலாளி. இவருக்கும், கோவை கணபதியை சேர்ந்த ஸ்ரீபிரியா, 30, என்பவருக்கும், 10 ஆண்டுகளுக்கு முன் காதல் திருமணம் நடந்தது. இரு குழந்தைகளுடன் தம்பதியர் திருநெல்வேலியில் வசித்தனர்.

சில ஆண்டுகளுக்கு முன், பாலமுருகனின் உறவினர் ராஜா என்பவருடன், ஸ்ரீபிரியாவுக்கு திருமணத்தை தாண்டிய உறவு ஏற்பட்டது. பாலமுருகன் இருவரையும் கண்டித்தார். உறவினர்களும் கண்டித்ததால், தம்பதியர் இடையே தகராறு ஏற்பட்டது.

இதையடுத்து, கோவை வந்த ஸ்ரீபிரியா, காந்தி புரம், ராஜூ நாயுடு வீதியில் உள்ள மகளிர் விடுதியில் தங்கி, ஒரு கடையில் பணிபுரிந்தார்.

நேற்று முன்தினம் கோவை வந்த பாலமுருகன், சேர்ந்து வாழ ஸ்ரீபிரியாவை சமாதானம் செய்தும், அவர் ஏற்கவில்லை.

இந்நிலையில், நேற்று காலை விடுதிக்கு சென்ற பாலமுருகன், ஸ்ரீபிரியாவை அரிவாளால் சரமாரியாக வெட்டி கொலை செய்தார்.

ரத்த வெள்ளத்தில் கிடந்த ஸ்ரீபிரியா உடலுடன் 'செல்பி' எடுத்து வாட்ஸாப்பில் ஸ்டேட்டஸ் வைத்தார். அதில், 'துரோகத்தின் சம்பளம் மரணம்' என, குறிப்பிட்டிருந்தார்.

பின், போலீசார் சம்பவ இடத்திற்கு வரும் வரை சடலத்தின் அருகிலேயே அமர்ந்திருந்தார். ரத்தினபுரி போலீசார் பாலமுருகனை கைது செய்து விசாரிக்கின்றனர்.