பாரதியார் பல்கலைக்கு உட்பட்ட கல்லுாரிகளுக்கு இடையே, ஆண்களுக்கான கபடி போட்டி பல்கலை உள்விளையாட்டு அரங்கில் நேற்று முன்தினம் துவங்கியது. எட்டு கல்லுாரி அணிகள் பங்கேற்ற இப்போட்டிகளை, பல்கலை உடற்கல்வித்துறை இயக்குனர் ராஜேஸ்வரன் துவக்கிவைத்தார்.

'நாக்-அவுட்' முறையிலான முதல் போட்டியில், டாக்டர் என்.ஜி.பி., கலை அறிவியல் கல்லுாரி அணியும், எஸ்.ஆர்.எஸ்., கல்லுாரி அணியும் மோதியது. அபாரமான ஆட்டத்தை வெளியப்படுத்திய என்.ஜி.பி., கல்லுாரி அணியினர், 58-17 என்ற புள்ளி கணக்கில் வெற்றிபெற்றனர்.

தொடர்ந்து, கே.பி.ஆர்., கல்லுாரி அணியும், பாரதியார் பல்கலை அணியும் மோதின. கடும் போட்டிகளுக்கு இடையே, இரு அணி வீரர்களும் திறமையான ஆட்டத்தை வெளிப்படுத்த, 31-29 என, இரு புள்ளிகள் வித்தியாசத்தில், கே.பி.ஆர்., அணி வென்றது.

ரத்தினம் கல்லுாரி அணி, 49-12 என்ற புள்ளி கணக்கில், காமதேனு கல்லுாரி அணியையும், ஈரோடு அரசு கலை அறிவியல் கல்லுாரி அணி, 48-17 என்ற புள்ளி கணக்கில், ராமு கலை அறிவியல் கல்லுாரி அணியையும் வென்றது.

வெற்றி பெற்ற நான்கு அணிகளுக்கும், 'லீக்' முறையில் போட்டிகள் நடந்துவருகின்றன.