பி.எஸ்.ஜி., தொழில்நுட்ப கல்லுாரியின் உடற்கல்வித்துறை சார்பில், 17வது 'மேஜர் தயான் சந்த் நினைவு கோப்பை'க்கான மாவட்ட அளவிலான ஹாக்கி போட்டி, பீளமேடு, பி.எஸ்.ஜி., டெக் மைதானத்தில் நேற்று துவங்கியது; வரும், 9ம் தேதி நிறைவடைகிறது.

ஆண்களுக்கான இப்போட்டியில், 10 அணிகள் மூன்று குழுக்களாக 'லீக்' முறையில் போட்டியிடுகின்றன. முதல் நாளான நேற்று முதல் போட்டியில், பி.எஸ்.ஜி., தொழில்நுட்பக் கல்லுாரி அணி, 4-0 என்ற கோல் கணக்கில் எஸ்.கே.சி.இ.டி., அணியை வென்றது.

அதிகபட்சமாக, வீரர் சஞ்சீவ் இரு கோல்கள் அடித்தார். இரண்டாம் போட்டியில் குமரகுரு தொழில்நுட்பக் கல்லுாரி அணி, 3-0 என்ற கோல் கணக்கில் பார்க் இன்ஜி., மற்றும் தொழில்நுட்பக் கல்லுாரி அணியை வென்றது. வீரர் அஸ்வதா இரு கோல்கள் விளாசினார்.

மூன்றாம் போட்டியில், பி.பி.ஜி.ஐ.டி., கல்லுாரி அணி, 1-0 என்ற கோல் கணக்கில் யு.ஐ.டி., கல்லுாரி அணியை வென்றது. பி.பி.ஜி.ஐ.டி., அணி வீரர் தவ விஸ்வா ஒரு கோல் அடித்தார். தொடர்ந்து போட்டிகள் நடந்து வருகின்றன.