பாலக்காடு முதல் பேரூர், வெள்ளலுார், சூலுார், பல்லடம், காங்கேயம், கரூர் வழியாகத் திருச்சி வரை இப்பாதை சென்றது. ஆயிரம் ஆண்டுகளுக்கு முன் இதற்கு, 'பெருவழி' என்று பெயர். பின், சோழ மன்னன் முதலாம் ஆதித்தன் இந்தச் சாலையைப் புதுப்பித்ததால், 'ராசகேசரிப் பெருவழி' என்ற பெயர் கிடைத்திருக்கலாம் எனவும், கல்வெட்டியல் அறிஞர் ச.குழந்தைவேலன் விளக்குகிறார்.

50 ஆண்டுகளுக்கு முன், சுண்டக்காமுத்துாருக்கு தெற்கே 6 கி.மீ., தூரத்தில் கண்டெடுக்கப்பட்ட கல்வெட்டில் கூட, இந்தப் பாதை 'ராசகேசரி பெருவழி' என குறிப்பிடப்பட்டுள்ளது. இந்தப் பெருவழி மார்க்கமாகவே வெள்ளலுார், ஆயிரக்கணக்கான ஆண்டுகளுக்கு முன்பே ஒரு வணிக மையமாக திகழ்ந்துள்ளது.

அங்கு கிடைத்த 500-க்கும் மேற்பட்ட ரோமானிய காசுகள், ரோமாபுரி குதிரைவீரன் பொறித்த தங்க மோதிரம், தங்கத் தாம்பாளம் போன்ற கண்டுபிடிப்புகள், இதற்குச் சான்று என, கல்வெட்டியல் நிபுணர் பூங்குன்றன் குறிப்பிடுகிறார்.