தமிழக கல்வித்துறையின் பெற்றோர் ஆசிரியர் கழகம் சார்பில் 'பெற்றோரை போற்றுவோம்' நிகழ்ச்சியின் கடைசி மண்டல மாநாடு கடலுார் மாவட்டம், வேப்பூர் அடுத்த திருப்பயரில் நேற்று நடந்தது. அதில், முதல்வர் ஸ்டாலின் பங்கேற்று சிறப்புரையாற்றினார். மாநாட்டில் பங்கேற்க 7 மாவட்டங்களை சேர்ந்த ஆசிரியர்கள், பெற்றோர் ஆசிரியர் கழகத்தினர் மற்றும் பொதுமக்கள் பஸ், வேன் உள்ளிட்ட வாகனங்களில் வேப்பூரில் குவிந்தனர்.

இந்த வாகனங்களால், வேப்பூரில் போக்குவரத்து நெரிசல் ஏற்படுவதை தடுக்க, வட மாவட்டங்களில் இருந்து வருவோருக்கு, சென்னை - திருச்சி தேசிய நெடுஞ்சாலையில் வேப்பூர் அடுத்த சேப்பாக்கம் - நகர் கிராம சாலையில் போக்குவரத்து மாற்றப்பட்டது.

இந்நிலையில், மாநாட்டிற்கு எதிர்பார்த்ததை விட மக்கள் அதிகளவில் வந்ததால் சென்னை - திருச்சி தேசிய நெடுஞ்சாலையில் இருபுறமும் வேப்பூர் அடுத்த சேப்பாக்கத்திலிருந்து 20 கி.மீ., துாரத்திற்கு மேல் வாகனங்கள் அணிவகுத்து நின்றதால் போக்குவரத்து நெரிசல் ஏற்பட்டது. இதனால், பயணிகள் பெரிதும் பாதிக்கப்பட்டனர்.