பண்ருட்டி டி.எஸ்.பி., ராஜா தலைமையில் இன்ஸ்பெக்டர் அசோகன், சப் இன்ஸ்பெக்டர்கள் தங்கவேல், பிரேம்குமார் ஆகியோர் கொண்ட தனிப்படையினர் நேற்று காலை பண்ருட்டி நான்கு முனை சந்திப்பில் வாகன சோதனையில் ஈடுபட்டனர்.

அப்போது, நெல்லிக்குப்பம் நோக்கி வந்த ஜி.ஜே.27-டி.பி.0023 பதிவெண் கொண்ட கியா கார், பி.ஒய்02 கியூ-0532 பதிவெண் கொண்ட மாருதி காரை சந்தேகத்தின் பேரில் காரை நிறுத்தி சோதனை நடத்தினர்.

அதில், 23 முட்டைகளில் 258 கிலோ குட்கா பொருட்கள் இருப்பது தெரிந்தது. இவற்றின் மதிப்பு 3 லட்சம் ரூபாய் ஆகும்.

விசாரணையில், நெல்லிக்குப்பம், சுல்தான்பேட்டை தெரு அப்துல்ரஷீத், 46; ராஜஸ்தான் மாநிலம் ஜாலுார் மாவட்டத்தை சேர்ந்த கண்ணாராம் மகன் ரமேஷ், 24; கேசராம் மகன் ஹரிஷ், 26; ராஜாராம் மகன் சங்கர்லால், 27; ஆகியோர் பெங்களூருவில் இருந்து விற்பனைக்காக கடத்தி வந்தது தெரிந்தது.

பண்ருட்டி போலீசார் வழக்குப் பதிந்து 4 பேரையும் கைது செய்து, குட்கா மற்றும் இரு கார்களை பறிமுதல் செய்தனர்.

எஸ்.பி., ஜெயக்குமார் பிடிபட்ட குட்கா பொருட்களை பார்வையிட்டு போலீசாரை பாராட்டினார்.