விருத்தாசலம் அரசு மாதிரி பெண்கள் மேல்நிலைப் பள்ளியில், 2025 - 26ம் கல்வி ஆண்டிற்கான குறுவட்ட விளையாட்டுப் போட்டிகள் நடந்தது. இதில், விருத்தாசலம் அரசு ஆண்கள், பெண்கள் மேல்நிலைப் பள்ளிகள், மங்கலம்பேட்டை அரசு மேல்நிலைப் பள்ளிகள், இருப்புக்குறிச்சி, கோ.ஆதனுார் உட்பட பல்வேறு அரசு பள்ளிகளை சேர்ந்த மாணவ, மாணவிகள் பங்கேற்றனர்.

அதில், மேஜைப்பந்து போட்டியில் விருத்தாசலம் அரசு ஆண்கள் மேல்நிலைப் பள்ளி மாணவர்கள் கவுசிக், சஞ்சய், கெனித்ஹர்மா ஆகியோர் 14 வயதுக்கு உட்பட்டோர் ஒற்றையர் மற்றும் இரட்டையர் பிரிவில் இரண்டாமிடம் பிடித்தனர்.

மேலும், 17 மற்றும் 19 வயதுக்கு உட்பட்டோர் ஒற்றையர் மற்றும் இரட்டையர் பிரிவில் மாணவர்கள் ஹரிஹரன், ஷாகித், ஷானவாஸ் ஆகியோர் முதலிடம் பிடித்தனர்.

இப்பள்ளி மாணவர்கள் மேஜைப்பந்து போட்டியில், தொடர்ந்து நான்கு ஆண்டுகளாக வெற்றி பெற்று சாதனை படைத்து வருகின்றனர். வெற்றி பெற்ற மாணவர்களுக்கு, பள்ளி தலைமை ஆசிரியர் வினோத்குமார் சான்றிதழ் வழங்கி, பாராட்டினர். உடற்கல்வி ஆசிரியர்கள் ராஜராஜசோழன், மனோகர், பிரகாசம் உடனிருந்தனர்.