நடுவீரப்பட்டு அரசு மேல்நிலைப்பள்ளியில் படிக்கும் மாணவர்களுக்கு பள்ளியின், முன்னாள் மாணவர்களான ஓய்வு பெற்ற தலைமையாசிரியர் வெற்றிவேல், ஓய்வு பெற்ற ஆசிரியர் மருதவாணன் சார்பில், தினமலர் நாளிதழின் பட்டம் இதழ் வழங்கப்பட்டு வருகிறது.

பள்ளியில் படிக்கும் மாணவர்களின் வாசிப்புத்திறனை அதிகரிக்கவும், பொது அறிவை வளர்க்கும் வகையிலும் ஆசிரியர்கள் பயிற்சி அளித்து வருகின்றனர். இப்பள்ளியில் புதுச்சேரி தினமலர் பட்டம் இதழ், ஆச்சார்யா கல்வி குழுமம் இணைந்து, 'பதில் சொல் பரிசு வெல்' வினாடி- வினா போட்டி நடத்தப்பட்டது.

இதில் 16 மாணவ,மாணவிகள் கலந்து கொண்டனர். மொத்தம் 8 குழுக்களாக பிரிந்து, 2 சுற்றுகளாக போட்டிகள் நடந்தன.

இதில் மாணவர்கள் தவனேஷ், அருண்குமார் ஆகியோர் முதலிடமும், மாணவர்கள் தீஷ்வர்,மணிமாறன் ஆகியோர் இரண்டாமிடமும் பிடித்தனர். பள்ளி தலைமை ஆசிரியர் சாந்தகுமாரி வெற்றி பெற்ற மாணவ,மாணவிகளுக்கு கேடயம் மற்றும் பதக்கங்கள் வழங்கினார்.

பங்கேற்ற அனைத்து மாணவ, மாணவிகளுக்கும் சான்றிதழ்கள் வழங்கப்பட்டன.