சட்டசபை தேர்தலை முன்னிட்டு மங்கலம்பேட்டை புறவழிச்சாலையில், விருத்தாசலம் ஊரக வளர்ச்சித்துறை பொறியாளர் சுபாஷ்சந்திரபோஸ் தலைமையிலான பறக்கும்படையினர் வாகன சோதனையில் ஈடுபட்டிருந்தனர்.

அப்போது, விருத்தாசலத்தில் இருந்து கள்ளக்குறிச்சி மார்க்கமாக சென்ற டாடா ஏஸ் வேனை நிறுத்தி சோதனை செய்தனர். அதில், உரிய ஆவணமின்றி 1 லட்சத்து 17 ஆயிரத்து 300 ரூபாய் எடுத்துச் சென்றது தெரிந்தது.

விசாரணையில், திராட்சை வியாபாரியான தேனி மாவட்டம், உத்தமபாளையம், சின்னமனுார் முத்தையா மகன் பூங் கொடி, 64, என்பவர் விருத்தா ச லம், கள்ளக்குறிச்சி பகுதிகளில் திராட்சை விற்பனை செய்த தொகையை பெற்றுச் செல்வது தெரிந்தது.

தொடர்ந்து, பறிமுதல் செய்யப்பட்ட ரொக்கம், விருத்தாசலம் தாசில்தார் பிரகாஷ் முன்னிலையில் அரசு கருவூலத்தில் ஒப்படைக்கப்பட்டது. ஆவணங்களை சமர்பித்து, பணத்தை பெற்றுச் செல்ல பூங்கொடியிடம் அறிவுறுத்தப்பட்டது.