புதுச்சேரி 'தினமலர் - பட்டம்' இதழ், ஆச்சார்யா கல்விக் குழுமம் இணைந்து பதில் சொல்; பரிசை வெல் என்ற வினாடி வினா போட்டி பள்ளிகளில் நடத்தப்பட்டு வருகிறது. இதையொட்டி, சிதம்பரம் வேங்கான் தெரு, காமராஜ் பள்ளியில் நடந்த வினாடி வினா போட்டியில் நுாற்றுக்கும் மேற்பட்ட மாணவ, மாணவிகள் ஆர்வமுடன் பங்கேற்றனர்.

இதில் 16 மாணவர்கள் தேர்வு செய்யப்பட்டனர். அவர்கள் 8 குழுக்களாக பிரிக்கப்பட்டு, அவர்களுக்கு மூன்று சுற்றுகளாக வினாடி வினா போட்டி நடந்தது. நிகழ்ச்சிக்கு, காமராஜர் மெட்ரிக் பள்ளி தாளாளர் கஸ்துாரி தலைமை தாங்கினார். பள்ளி முதல்வர் முத்து சக்தி முன்னிலை வகித்தனர்.

போட்டியில் மாணவர்கள், தன்வீஷ், முகமதுஷாகித் ஆகியோர் கொண்ட குழு முதலிடத்தையும், மாணவிகள் திவ்யபாரதி, பசியா ஆகியோர் கொண்ட குழு இரண்டாம் இடத்தையும் பிடித்தனர்.

வெற்றி பெற்ற மாணவர்களுக்கு சான்றிதழ், கேடயம் மற்றும் பதக்கம் வழங்கப்பட்டது. இந்த வினாடி வினா போட்டியில் பங்கேற்ற அனைத்து மாணவ, மாணவிகளுக்கும் சான்றிதழ் வழங்கி கவுரவிக்கப்பட்டனர். ஏற்பாடுகளை ஆசிரியர்கள் கனிமொழி, சத்யா ஆகியோர் செய்திருந்தனர்.