கிருஷ்ணகிரி மாவட்டம், போச்சம்பள்ளி ஒழுங்குமுறை விற்பனை கூடத்தில், இ--நாம் முறையில் கொப்பரை தேங்காய் ஏலம் நடந்தது. இதில், 3,181 கிலோ கொப்பரை தேங்காய்கள், கிலோ ஒன்றுக்கு அதிகபட்சம், 234.56- ரூபாய், குறைந்தபட்சம், 75.10- ரூபாய் என, சராசரியாக கிலோ ஒன்று, 227.10 ரூபாய்க்கு ஏலம் போனது. அதன்படி, 6.89 லட்சம் ரூபாய்க்கு கொப்பரை விற்பனையானது. இதன் மூலம், 40 விவசாயிகள் பயன்பெற்றனர்.

இதுகுறித்து, போச்சம்பள்ளி ஒழுங்குமுறை விற்பனைக்கூட கண்காணிப்பாளர் அருள்வேந்தன் கூறுகையில், ''இங்கு நடக்கும் ஏலத்தில் பல்வேறு மாவட்டங்களில் இருந்து வியாபாரிகள் பங்கேற்றனர். இ--நாம் முறையில் நடந்த ஏலத்தில் கொப்பரை தேங்காய்கள் நல்ல விலைக்கு போனது. விற்பனை செய்யப்பட்ட தொகைகள் உடனடியாக விவசாயிகளின் வங்கி கணக்கில் செலுத்தப்பட்டது. மேலும், கொப்பரை, பருத்தி மட்டுமின்றி நெல் ஏலமும் மின்னணு வர்த்தக முறையில் நடக்க உள்ளதால், நெல் விவசாயிகள் இதை பயன்படுத்தி கொள்ளலாம்,'' என்றார்.