தர்மபுரி மாவட்டம், அரூர் அடுத்த தீர்த்தமலை தீர்த்தகிரீஸ்வரர் கோவிலில், ஹிந்து சமய அறநிலையத்துறை சார்பில், தர்மபுரி, தி.மு.க., - எம்.பி., மணி, 9 ஜோடிகளுக்கு இலவச திருமணத்தை நேற்று நடத்தி வைத்தார். தொடர்ந்து, மணமக்களுக்கு பீரோ, மெத்தை, தலையணை உள்ளிட்ட, தலா, 60,000 ரூபாய் மதிப்பிலான பல்வேறு சீர்வரிசை பொருட்கள் வழங்கப்பட்டன. சேலம், ஹிந்து சமய அறநிலையத்துறை துணை ஆணையாளர் விமலா, தர்மபுரி மேற்கு மாவட்ட தி.மு.க., செயலாளர் பழனியப்பன், அரூர் கிழக்கு ஒன்றிய செயலாளர் சந்திரமோகன், மேற்கு மாவட்ட சுற்றுச்சூழல் அணி துணை அமைப்பாளர் கிருஷ்ணமூர்த்தி உட்பட பலர் கலந்து கொண்டனர்.

* தர்மபுரி மாவட்ட ஹிந்து சமய அறநிலையத்துறை சார்பில், 5 ஜோடிகளுக்கு இலவச திருமண நிகழ்ச்சி நேற்று நடந்தது. தர்மபுரி, பா.ம.க., - எம்.எல்.ஏ., வெங்டேஸ்வரன் தலைமை வகித்தார். செங்குந்தர் திருமண மண்டபத்தில் நடந்த விழாவில், 5 ஜோடி தம்பதிகளுக்கு இலவச திருமணம் நடத்தி வைக்கப்பட்டது. அறநிலையத்துறை உதவி கமிஷனர் மகாவிஷ்ணு, தர்மபுரி கிழக்கு மாவட்ட, தி.மு.க., செயலாளர் தடங்கம் சுப்பிரமணி, அறங்காவலர் குழு தலைவர் கவுதமன் உட்பட பலர் திருமணத்தை நடத்தி வைத்தனர். பின், அவர்களுக்கு, 4 கிராம் தங்கத்தாலி மற்றும் 24 வகை சீர்வரிசை பொருட்கள் இலவசமாக வழங்கப்பட்டன. செயல் அலுவலர்கள் ஜீவானந்தம், முருகன், ராஜகோபால் மற்றும் பலர் பங்கேற்றனர்.