அதேபோல், வத்தல்மலை கிராமங்களிலும் இந்தாண்டு கடுமையான வறட்சி ஏற்பட்டுள்ளது. இங்குள்ள தடுப்பணைகள், நீர்நிலைகள் உள்ளிட்ட அனைத்தும் முழுமையாக வறண்டு விட்டது.குறிப்பாக பெரியூர் பகுதியில் இரண்டு பொதுக்கிணறுகள் உள்ளன. அதில், ஒரு கிணற்றில் மின் மோட்டார் பொருத்தி, மேல்நிலை நீர் தொட்டிக்கு தண்ணீர் நீரேற்றம் செய்து, பொதுமக்களுக்கு வினியோகம் செய்யப்பட்டது. அந்த கிணறும் முழுமையாக வற்றியதால், மேல்நிலை நீர் தேக்க தொட்டிக்கு நீரேற்றம் செய்ய முடியவில்லை. அதன் அருகில் உள்ள மற்றொரு கிணற்றிலும், 2 அடி அளவிற்கு மட்டுமே தண்ணீர் உள்ளது. இதனால், அப்பகுதி பொதுமக்கள் அதிகாலை, 5:00 மணி முதல் கயிறுகள் மூலம் பக்கெட்டுகளை கட்டி தண்ணீர் எடுத்து வருகின்றனர்.இதில், குறைந்த அளவில் தண்ணீர் இருப்பதால், சேறு கலந்து வருகிறது. எனவே, துணிகளை குடத்தின் மேல் வைத்து, வடிகட்டி பயன்படுத்தும் அவலநிலை ஏற்பட்டுள்ளதாக, அப்பகுதி மக்கள் தெரிவித்தனர். சில இடங்களில் தண்ணீர் அறவே இல்லாததால், மலை அடிவாரத்தில் இருந்து டிராக்டர்கள் மூலம், பணம் கொடுத்து தண்ணீரை வாங்கிச் செல்கின்றனர்.வத்தல்மலை கிராமங்களில் முதல் முறையாக, ஏற்பட்டுள்ள கடுமையான வறட்சியை அப்பகுதி மக்கள் சமாளிக்க முடியாமல் திணறி வருகின்றனர். மாவட்ட நிர்வாகம் சார்பில், குடிநீர் தட்டுப்பாட்டை தீர்க்க, ஆழ்துளை கிணறுகள் அமைத்து கொடுக்க வேண்டும் என, அப்பகுதி பொதுமக்கள் கோரிக்கை விடுத்துள்ளனர்.