மல்லிகை நகர் குடியிருப்போர் நலச்சங்க தலைவர் அழகர்சாமி, செயலாளர் ரமேஷ்குமார், பொருளாளர் சேதுராமன், நிர்வாகிகள் ஆனந்தன், சண்முகம், முருகேசன், சீனிவாசன், திலகா, ரேவதி, சிவசங்கரன் கூறியதாவது:

திண்டுக்கல் பழைய கரூர் ரோடு புறநகர் சீலப்பாடி ஊராட்சி பகுதியில் மல்லிகை நகர்உள்ளது.

தேசிய நெடுஞ்சாலையை ஒட்டிய பகுதியே என்றாலும் இணைப்பு ரோடுகள் ஏதும் இல்லை.

தெருக்களில் குப்பை அள்ள வருவது கிடையாது.

மின்கம்பங்களில் சிறிய பல்புகளே உள்ளன. அவை அடிக்கடி பழுதாவதால் இரவில் பெரும் சிரமம் ஏற்படுகிறது. குடிநீர் 15 நாட்களுக்கு ஒருமுறை மட்டுமே வருகிறது.

இதுவம் எப்போது வருகிறதென்றே தெரியவில்லை. இதனால் பொதுமக்கள் இன்னலுக்கு ஆளாகின்றனர். குடிநீர் குழாய்க்கு பணம் கட்டியும் ஒரு பலனும் இல்லை.

வரி மட்டும் பெற்றுக் கொள்கின்றனர். குடிப்பதற்கான தண்ணீரை விலை கொடுத்து வாங்கும் நிலை உள்ளது. ரோடுகள் இடை இடையே இல்லாமல் விடுபட்டுள்ளதால் பாதசாரிகள், வாகன ஓட்டிகள் சிரமத்திற்குள்ளாகின்றனர்.

50க்கு மேற்பட்ட தெருநாய்கள் குடியிருப்பு பகுதிகளை சுற்றி வருவதால் குழந்தைகள் முதல் முதியவர்கள் வெளியே செல்லவே அச்சப்படுகின்றனர்.

பலமுறை புகார் அளித்தும் எந்தவித நடவடிக்கையும் இல்லை, சாக்கடை இல்லாமல் வீடுகளில் குழிகள், செப்டிக் டேங்க் அமைத்து கழிவுநீரை விடுகின்றனர்.

சில இடங்களில் கழிவுநீர் ரோடுகளில் வழிந்தோடுகிறது. இதனால் தொற்று நோய் அபாயம், கொசு தொல்லை உள்ளது.

காலி இடங்களில் புதர் மண்டி கிடப்பதால் பாம்புகள் உள்ளிட்ட விஷ ஜந்துக்கள் நடமாட்டம் அதிக அளவில் உள்ளது. இவை அவ்வப்போது வீடுகளுக்குள் படையெடுக் கின்றன என்றனர்.