ஒட்டன்சத்திரம், காவேரியம்மாபட்டி சுற்றிய கிராமப் பகுதிகளில் கோவக்காய் அதிகமாக பயிரிடப்படுகிறது.

சில நாட்களுக்கு முன்பு வரை விளைச்சல் அதிகமாக இருந்ததால் மார்க்கெட்டிற்கு வரத்து அதிகரித்து காணப்பட்டது.

இதனால் விலை சரிவடைந்து கிலோ ரூ.20 முதல் 25 வரை விற்பனையானது.

இந்நிலையில் மழைக்காலம் , பனிக்காலம் தொடங்கியதால் கோவக்காய் செடிகள் நோய் தாக்குதலுக்கு ஆளாகி விளைச்சல் பாதிக்கப்பட்டது.

இதன் காரணமாக மார்க்கெட்டுக்கு வரத்து குறையத் தொடங்கியது. அதற்கு ஏற்ப விலையும் அதிகரிக்க தொடங்கி கிலோ ரூ.48க்கு விற்பனை ஆனது.

காவேரியம்மாபட்டி விவசாயி பழனிமுத்து கூறியதாவது: விளைச்சல் அதிகமாக இருந்தபோது கட்டுப்படியான விலை கிடைக்காமல் பாதிக்கப்பட்ட விவசாயிகள் தற்போது விலை அதிகரித்திருந்த போதிலும் விளைச்சல் இல்லாததால் விரக்தி அடைந்துள்ளனர் என்றார்.