கொடைக்கானலில் நடந்த மலர் கண்காட்சி, கோடை விழாவின் போது நகராட்சி சார்பில் பஸ் ஸ்டாண்ட், அப்சர்வேட்டரி ரோஜா பூங்கா பகுதியில் பார்க்கிங் வசதியை ஏற்படுத்தியது.

இவ்வாறான நிலையில் இங்கு வரும் சுற்றுலா பயணிகள் பார்க்கிங் வசதியை பயன்படுத்தாமல் ரோட்டோரம் நிறுத்தும் போக்கை தொடர்கின்றனர்.

இதனால் போக்குவரத்து பாதிப்பு ஏற்படுகிறது. அண்ணாசாலை, உட்வில் ரோடு, கிளப் ரோடு, செவன் ரோடு மூஞ்சிக்கல் உள்ளிட்ட பகுதிகளில் நிறுத்தப்பட்ட வாகனங்களால் நெரிசல் ஏற்பட்டு வருகிறது. நகராட்சி பார்க்கிங் வசதியை ஏற்படுத்திய போதும் போலீசாரின் ஒத்துழைப்பு இல்லாததால் வாகனங்கள் ரோட்டோரம் நிறுத்தும் போக்கு உள்ளது.

துவக்கத்தில் பார்க்கிங் தவிர்த்து ரோட்டில் நிறுத்தப்படும் அனைத்து வாகனங்களுக்கும் அபராதம் விதிக்கப்படும் என திண்டுக்கல் கலெக்டர் சரவணன் எச்சரித்த போதும் போலீசார் துளியும் நகராட்சிக்கு ஒத்துழைப்பு அளிக்கவில்லை.

மாறாக இது போக்குவரத்து நெரிசலுக்கு வித்திடுகிறது. போக்குவரத்து நெரிசலை கட்டுப்படுத்த ரோட்டோரம் நிறுத்தும் வாகனங்கள் மீது மாவட்ட நிர்வாகம் கடும் நடவடிக்கை எடுத்தால் மட்டுமே இது தவிர்க்கப்படும்.