வடமதுரை பேரூராட்சி தும்மலக்குண்டில் பல்வேறு இடங்களில் பெய்யும் மழை நீர் வடக்கு தெருவில் சேர்கிறது. இங்குள்ள சிலர் தங்கள் நிலம் வழியே நீர் வெளியேறுவதை விரும்பாமல் கரை கட்டி தடுப்புகளை ஏற்படுத்தி வைத்துள்ளனர்.

இதனால் ஒவ்வொரு மழைக்கும் இங்குள்ள 3 வீதி பாதையிலும் மழை நீர் தேங்கி நிற்கும் நிலை உள்ளது. மழை நீர் வெளியேறாத நிலையில் அப்பகுதி மக்கள் பாதையை பயன்படுத்துவதில் கடும் சிரமம் ஏற்படுகிறது. பழமையான வீடுகள் பாதிப்படைந்து வருகிறது. குழந்தைகளுக்கு காய்ச்சல் உள்ளிட்ட பாதிப்புகள் ஏற்படுகிறது. குடிநீர் குழாய்களில் நீர் எடுத்து வருவதிலும் சிக்கல் ஏற்படுகிறது.

இங்கு தேங்கும் நீரை வெளியேற்ற அதிகாரிகள் தகுந்த தீர்வை கண்டறிய நடவடிக்கை எடுக்க வேண்டும்.

-த.வெ.க., கிளைத் தலைவர் வி.சுரேஷ் கூறுகையில்,''தும்மலக்குண்டு வடக்கு தெருவில் நீர் வழிந்து சேகரமாகும் பகுதி பள்ளமாக இருப்பதால் ஒரு பகுதியில் கடைசியாக தேங்கும் நீரை தனிநபர்கள் இடம் வழியே மட்டுமே வெளியேற்ற முடியும் என்ற நிலை உள்ளது.

இதனாலே இங்கு நீர் தேங்கும் பிரச்னை நீடிக்கிறது. நீர் வெளியேற நடவடிக்கை எடுப்பதுடன் சிமென்ட் ரோடாக மாற்றி அமைக்க வேண்டும்.

இங்குள்ள சிக்கலான சூழ்நிலையை ஆய்வு செய்து தகுந்த நடவடிக்கை எடுக்க வேண்டும்'' என்றார்.

-தொழிலாளி பி.துரைப்பாண்டி கூறுகையில், ''வடக்கு தெரு பகுதியில் சேகரமாகும் மழை நீர் வெளியேறாமல் தடுக்கப்பட்டுள்ளதால் ஒரு அடிக்கு மேல் நீர் தேங்கி பழமையான மண் வீடுகளை பாதிப்படைய செய்கிறது.

வீடுகள் இடிந்து அசாம்பவிதம் நடக்குமோ என்ற அச்சத்தில் மக்கள் உள்ளனர். மேலும் சகதி காடாக மாறுவதால் டூவீலர்கள் வழுக்கி விபத்து ஏற்படுகிறது. குழந்தைகளுக்கு எளிதில் காய்ச்சல் உள்ளிட்ட பாதிப்புகள் ஏற்படுகிறது''என்றார்.