சாலைவழியில் தென் மாவட்டங்களுக்கு பயணிப்போருக்கு திண்டுக்கல் மாவட்டம் நுழைவு வாசலாக உள்ளது. திண்டுக்கல்லை சுற்றிலும் சேலம், கரூர், திருச்சி, தேனி, மதுரை என நான்கு திசைகளிலும் தேசிய நெடுஞ்சாலைகள் உள்ளன.இதுதவிர நகர், கிராமப்புறங்களை இணைக்கும் வகையில் மாநில நெடுஞ்சாலைகளும், தேசிய நெடுஞ்சாலையுடன் இணைக்கப்பட்டுள்ளன. இதனால் எந்நேரமும் கன்டெய்னர் லாரிகள், சரக்கு வாகனங்கள், பஸ், கார், டூவீலர் என ஓயாத வாகன சத்தமாக பல லட்சக்கணக்கானோர் கடந்து செல்லும் பகுதியான திண்டுக்கல் மாவட்டத்தில் சமீபக்காலமாக நெடுஞ்சாலையில் அதிக விபத்துகள் நடப்பது அதிர்ச்சி அளிக்கிறது.இதில் ஏற்படும் இறப்புகளும் அதிகரித்துள்ளன.

காயமடைந்தவர்கள் கை, கால் உறுப்பு இழப்புகளை சந்திக்கும் அளவிற்கு கோர விபத்துகளில் சிக்குவது வருந்ததக்கது. ஒரு மாதத்தில் தோராயமாக 10க்கு மேற்பட்டோர் இறந்துள்ளனர். 60க்கு மேற்பட்டோர் காயமடைந்துள்ளனர்.இதற்கு முக்கிய காரணம் வாகன ஓட்டிகளின் கவனக்குறைவாக இருந்தாலும் நெடுஞ்சாலைகளில் தேவையான இடங்களில் எதிரொலிப்பு எச்சரிக்கை பலகைகள், விளக்குகள், போலீஸ் ரோந்து இல்லாதது முக்கிய காரணம்.நெடுஞ்சாலையில் விபத்துக்கள், வாகன நெரிசல் உள்ளிட்டவற்றை கண்காணிக்கவே பேட்ரோல் யூனிட்கள் உள்ளன. ஆனால் இவை போதுமான அளவு இல்லை என்பது குற்றச்சாட்டாக உள்ளது.

நெடுஞ்சாலையில் திடீரென பழுதாகி நிற்கும் வாகனங்களை எச்சரித்து காட்டவும், போக்குவரத்தை மாற்றுப்பாதையில் திசைத்திருப்பவும் ஆரஞ்சு நிற கூம்புகள் பயன்படுத்தப்படும். ஆனால் சமீபத்தில் நடந்த இரவு நேரத்தில் நடந்த சாலை விபத்துக்களுக்கு இதுமாதிரியான எச்சரிக்கை குறிகள், பலகைகள் இல்லாதது முக்கியக்காரணம்.

பழநி, வத்தலக்குண்டு, உடுமலைபேட்டை பைபாஸ் சாலையில் அடிக்கடி விபத்துக்கள் ஏற்படுவதை தடுக்க பேட்ரோல் வாகனங்கள் ரோந்து செல்லவேண்டும். ஆபத்தான வளைவுகள், அடிக்கடி விபத்து ஏற்படும் இடங்களில் இரவிலும் எதிரொலிக்கும் எச்சரிக்கை பலகைகள் நிறுவி வாகன ஒட்டிகளை அலர்ட் செய்ய நடவடிக்கை எடுக்கவேண்டும்.

ரோந்தை அதிகரிக்கலாம்

நெடுஞ்சாலையில் ரோந்து வாகனங்கள் அனைத்து இடங்களையும் கவர் செய்யும் வகையில் ரோந்து செல்வதில்லை. குறிப்பிட்ட துாரத்தில் நின்று விடுகின்றனர். ரோந்து வாகனங்களை அதிகரித்து மாவட்டத்தை முழுவதும் சுற்றிச்வர செய்யும்படி நெடுஞ்சாலை கண்காணிப்பில் கவனம் செலுத்த வேண்டும்.விபத்து ஏற்பட்டால் அவசர உதவிக்கு ‛நகாய்' உதவி எண்கள், தன்னார்வல ஆம்புலன்ஸ் எண்கள் உள்ளிட்டவைகளை முக்கிய இடங்களில் வாகன ஓட்டிகள் கண்ணில் படும்படி நிறுவலாம். குறிப்பாக இரவில் பிரேக்டவுனாகி நிற்கும் வாகனங்களை அடையாளப்படுத்திக்காட்ட எச்சரிக்கை செய்ய நடவடிக்கை எடுப்பதோடு பாதுகாப்புடனும் கவனமுடன் வாகனஓட்டிகள் கடந்துசெல்வதற்கு போலீசாரை பணியில் ஈடுபடுத்த வேண்டும்.

-செந்தில்வேல், பா.ஜ.,இளைஞரணி முன்னாள் தலைவர்,திண்டுக்கல்