அந்தியூர்:மத்திய அரசு சார்பில், ஆண்டுதோறும் தரமாக செயல்படும் அரசு மருத்துவமனைகள் தேர்வு செய்யப்பட்டு தர சான்றிதழ் வழங்கப்படுகிறது. இதன்படி அந்தியூர் அரசு மருத்துவமனைக்கு, தர சான்றிதழ் விருது கிடைத்துள்ளது.

முன்னதாக ஆந்திரா, தெலுங்கானா மாநில பார்வையாளர்கள், கடந்த ஆண்டு டிச., மாதம் ஆய்வு மேற்கொண்டனர். புறநோயாளிகள் பிரிவு, உள்நோயாளிகள் பிரிவு, அவசர சிகிச்சை பிரிவு, எக்ஸ்ரே பிரிவு, அறுவை சிகிச்சை அரங்கு பராமரிப்பு, சமையலறை பராமரிப்பு, உடற்கூறு ஆய்வரங்கு என, 13 பிரிவுகளில் தர பரிசோதனை நடந்தது. இதில், 90 புள்ளிகளை பெற்றதால், விருது கிடைத்துள்ளது. சென்னையில் நடந்த விழாவில், இதற்கான சான்றிதழை மக்கள் நல்வாழ்வுத்துறை அமைச்சர் சுப்பிரமணியம் வழங்க, மருத்துவமனை மருத்துவர் ராம்குமார், செவிலியர் குமாரசாமி பெற்றுக்கொண்டனர். இந்நிலையில் தரச்சான்றிதழ் விருதுடன் அந்தியூர் அரசு மருத்துவமனையில் மருத்துவர்கள் உட்பட அனைத்து பணியாளர்களும், குழு புகைப்படம் எடுத்து கொண்டனர்.