கோபிசெட்டிபாளையம்:கோபி ஒத்தக்குதிரை உள்ளிட்ட மூன்று அரசு நெல் கொள்முதல் நிலையங்களில் சென்ற ஆறு நாட்களில் 68 டன் நெல் கொள்முதல் செய்யப்பட்டுள்ளது. நெல் கொள்முதல் நிலையங்களில் போதிய வசதி செய்து தரவில்லை என, விவசாயிகள் குற்றம்சாட்டுகின்றனர்.தடப்பள்ளி, அரக்கன்கோட்டை பாசனப் பகுதியில் நெல் அறுவடை மும்முரமாக நடந்து வருகிறது. பொலவகாளிபாளையம், நஞ்சகவுண்டன்பாளையம், புதுவள்ளியாம்பாளையம், டி.என்.பாளையம், காசிபாளையம், அத்தாணி, புதுக்கரைபுதூர், கள்ளிபட்டி, கூகலூர் ஆகிய ஒன்பது இடங்களில் நெல் கொள்முதல் நிலையங்கள் திறக்கப்பட்டுள்ளன. சன்ன ரகத்துக்கு 11 ரூபாயும், குண்டு ரகத்துக்கு 10.50 ரூபாயும் விலை கிடைக்கிறது. அரசு கொள்முதல் நிலையங்களுக்கு நெல் வரத்து அதிகரித்து, கடந்த ஆறு நாட்களில் 68 டன் நெல் கொள்முதல் செய்யப்பட்டுள்ளது. குண்டு ரகத்தை விட சன்ன ரக நெல் அதிகம் வரத்தாகிறது. குண்டு ரகத்துக்கு அரசு நெல் கொள்முதல் நிலையங்களில் 10.50 பைசாதான் வழங்கப்படுகிறது. ஆனால், வெளிமார்க்கெட்டில் 15 ரூபாய் வரை வியாபாரிகள் தருகின்றனர். இதனால், குண்டு ரக நெல்லை வெளிமார்க்கெட்டில் விற்பனை செய்யவே விவசாயிகள் ஆர்வம் காட்டுகின்றனர். நெல் கொள்முதல் நிலையங்களில் போதிய வசதிகள் இதுவரை செய்து தரவில்லை என, விவசாயிகள் குற்றம் சாட்டுகின்றனர்.