இது குறித்து, நாமக்கல் கால்நடை மருத்துவக்கல்லுாரி வானிலை ஆய்வு மையம் வெளியிட்டுள்ள, அறிவிப்பில் கூறியிருப்பதாவது: நாமக்கல் மாவட்டத்தில் கடந்த, 5 நாட்களில் பல இடங்களில் லேசானது முதல் மிதமானது வரை மழை பெய்துள்ளது. பகல் நேர அதிகபட்ச வெப்பம் 33 டிகிரி செல்சியஸாகவும், இரவு நேர வெப்பம் 25 டிகிரி செல்சியஸாகவும் நிலவியது. இன்று (அக்.,18) முதல் 22ம் தேதி வரை 5 நாட்களுக்கு அதிகபட்ச பகல் நேர வெப்ப நிலை 27 முதல் 31 டிகிரி செல்சியஸ் வரை இருக்கும். குறைந்தபட்ச இரவு நேர வெப்பநிலை 20 முதல் 24 டிகிரி செல்சியஸ் வரை இருக்கும்.

வானம் மேக மூட்டத்துடன் காணப்படும். காற்றின் ஈரப்பதம், 60 முதல் 90 சதவீதம் வரை இருக்கும். காற்றின் வேகம் கிழக்கு, வடகிழக்கு மற்றும் தென்கிழக்கு திசையில் இருந்து மணிக்கு 4 முதல் 6 கி.மீ., வேகத்தில் வீசக்கூடும். இன்று 19 மி.மீ, நாளை 28, 20ம் தேதி, 8, 21ல், 11, 22ம் தேதி 28 மி.மீ., வரை மழை பெய்ய வாய்ப்புள்ளது. இவ்வாறு அதில் கூறப்பட்டுள்ளது.