கள்ளக்குறிச்சி அரசு பணிமனையைச் சேர்ந்த தடம் எண்.451 அரசு பஸ். நேற்று முன்தினம் இரவு பெங்களூருவிலிருந்து கள்ளக்குறிச்சி நோக்கி வந்துகொண்டிருந்தது. கள்ளக்குறிச்சியைச் சேர்ந்த பஸ்சை தற்காலிக டிரைவர் விஜய் ஓட்டி வந்தார். கண்டக்டர் மனோகரன் பணியிலிருந்தார்.

அதிகாலை 3:30 மணியளவில் சங்கராபுரம் அடுத்த மூரார்பாளையம் ஆற்றுப் பாலத்தின் மீது வந்தபோது டிரைவரின் கட்டுப்பாட்டை இழந்த பஸ், பாலத்தின் தடுப்புச் சுவரை உடைத்துக்கொண்டு அந்தரத்தில் தொங்கியது.

இதில் பஸ்சின் முன்பக்கம் சேதமடைந்தது. பஸ்சில் இருந்த 4 பயணிகளும் அதிர்ஷ்டவசமாக காயமின்றி தப்பினர். அவர்கள் மாற்று பஸ்சில் கள்ளக்குறிச்சிக்கு அனுப்பி வைக்கப்பட்டனர்.

விபத்து குறித்து சங்கராபுரம் போலீசார் வழக்குப் பதிந்து விசாரிக்கின்றனர்.