கள்ளக்குறிச்சி: முதலமைச்சர் கோப்பை விளையாட்டு போட்டிகளில் பங்கேற்க இணையதளம் மூலம் முன்பதிவு செய்யலாம்.

இது குறித்து கலெக்டர் பிரசாந்த் செய்திகுறிப்பு;

கள்ளக்குறிச்சி மாவட்டத்தில் பள்ளி, கல்லுாரி மாணவர்கள், மாற்றுத்திறனாளிகள், பொதுமக்கள் மற்றும் அரசு ஊழியர்களுக்கு முதலமைச்சர் கோப்பை விளையாட்டு போட்டிகள் செப்-அக்., மாதங்களில் நடக்கிறது. இதில் 5 பிரிவுகளில் 27 விளையாட்டு போட்டிகள் நடத்தப்படுகிறது.

இதில் பங்கேற்க விரும்பும் விளையாட்டு வீரர், வீராங்கனைகள் தமிழ்நாடு விளையாட்டு மேம்பாட்டு ஆணைய இணைதளம் www.sdat.tn.gov.in மூலம் குழு மற்றும் தனிநபர் விவரங்களை பதிவு செய்ய வேண்டும். பள்ளி மாணவர்கள் 12 -19 வயது வரை, கல்லுாரி மாணவர்கள் 17-௨5 வயது வரை தடகளம், இறகுபந்து, கூடைபந்து, கிரிக்கெட், கால்பந்து, ஹாக்கி, கபடி, சிலம்பம், நீச்சல், மேசைப்பந்து, வாலிபால், கேரம், கைப்பந்து, சதுரங்கம், கோ-கோ ஆகிய போட்டிகள் நடத்தப்படுகிறது.

மாற்றுத்திறனாளிகளுக்கு(வயது வரம்பு இல்லை) தடகளம், இறகுபந்து, வீல் சேர் மேசைபந்து, பார்வையற்ற மாற்றுத்திறனாளிகளுக்கு தடகளம், மனநலம் குன்றியவர்கள்- தடகளம், எறிபந்து, செவித்திறனற்ற மாற்றுத்திறனாளிகள்- தடகளம், கபடி ஆகிய போட்டிகள் நடக்கிறது.

பொதுமக்களுக்கு 15-35 வயது வரை மற்றும் அரசு ஊழியர்களுக்கு(வயது வரம்பு இல்லை) தடகளம், இறகுபந்து, சதுரங்கம், கபடி, கேரம் போட்டிகள் நடத்தப்படுகிறது. மேலும், விபரங்களை மாவட்ட விளையாட்டு மற்றும் இளைஞர் நலன் அலவலக எண் 7401703474 மற்றும் தகவல் தொடர்பு மையம் 95140 00777 என்ற எண்ணில் தொடர்பு கொள்ளலாம்.

முதல்வர் கோப்பை விளையாட்டு போட்டியில் கள்ளக்குறிச்சி மாவட்டத்தை சேர்ந்தவர்கள் பெரும் அளவில் கலந்து கொள்ள வேண்டும்.

இவ்வாறு அவர் தெரிவித்துள்ளார்.