பள்ளிக்கல்வித் துறை, ஊரகப்பகுதி அரசுப் பள்ளிகளில், 9ம் வகுப்பு பயிலும் மாணவர்களுக்கு ஊரகத் திறனாய்வுத் தேர்வு நடத்தி வருகிறது. இதில் தேர்ச்சி பெறும் மாணவர்களுக்கு ஆண்டிற்கு ரூ.1,000 வீதம் 4 ஆண்டுகளுக்கு கல்வி உதவித் தொகை வழங்கப்படுகிறது. அதன்படி கடந்த, 2024ம் ஆண்டில் டிசம்பர் மாதம், கள்ளக்குறிச்சி மாவட்டத்தில் இந்த தேர்வு எழுதிய மாணவர்களில், 57 பள்ளிகளில் இருந்து 114 மாணவர்கள் தேர்ச்சி பெற்றனர். இவர்களுக்கு ஆண்டிற்கு ரூ.1,000 வீதம் 4 ஆண்டுகளுக்கு கல்வி உதவித் தொகை வழங்கப்பட உள்ளது.

இந்த தேர்வில் அதிகபட்சமாக தியாகதுருகம் மகளிர் மேல்நிலைப் பள்ளியில், 10 மாணவியர், சித்தேரிப்பட்டு மேல்நிலைப் பள்ளியில், 8 மாணவர்கள், பல்லகச்சேரி உயர்நிலைப் பள்ளியில், 7 மாணவர்கள் தேர்ச்சி பெற்றனர்.

இந்த பள்ளி தலைமை ஆசிரியர்களை, கலெக்டர் பிரசாந்த் நேரில் பாராட்டி சான்றிதழ்களை வழங்கி கவுரவித்தார். கலெக்டர் அலுவலகத்தில் நடந்த நிகழ்ச்சியில், சி.இ.ஓ., கார்த்திகா, சி,இ.ஓ., நேர்முக உதவியாளர் தண்டபாணி உள்ளிட்டோர் கலந்து கொண்டனர்.