கள்ளக்குறிச்சி கலெக்டர் பிரசாந்த் விடுத்துள்ள செய்திக்குறிப்பு;

'டிட்வா' புயல் காரணமாக மாவட்டத்திற்கு 'ஆரஞ்சு அலர்ட்' விடுக்கப்பட்டுள்ளது. அதிகளவு மழை பெய்யும் பட்சத்தில் ஆடு, மாடு, கோழி உள்ளிட்ட கால்நடைகளுக்கு உடல்நல பிரச்னைகள் ஏற்பட வாய்ப்புள்ளது.

இதில் கோழிகளுக்கு எளிதாக நோய்த்தொற்று ஏற்பட்டு பரவ வாய்ப்புள்ளது. எனவே, கோழிகள் குடிப்பதற்கு வெது வெதுப்பான தண்ணீரை அளிக்க வேண்டும். கோழிக்குஞ்சுகளுக்கு தகுந்த அடைகாப்பான் அமைத்து அதற்கு தேவையான வெப்பத்தை அளிக்க வேண்டும்.

கோழி கொட்டகைகளில் வைக்கப்பட்டுள்ள பொருட்கள் நன்கு உலர்வாக இருக்க வேண்டும். ஈரம் உறிஞ்சும் வகையில் உள்ள பொருட்கள் எளிதில் நோய் தாக்கத்தை ஏற்படுத்தும்.

மழை மற்றும் குளிர் காலத்தில் கோழிகளின் இறகுகள் உதிர்வதை தவிர்க்க வெது வெதுப்பான தண்ணீரில் உயிர்சத்து மருந்துகளை கலந்து அளிக்கலாம். மேலும், வெள்ளை கழிச்சல் நோய் தடுப்பூசியை அருகிலுள்ள கால்நடை மருந்தகத்தை அணுகி கோழிகளுக்கு செலுத்தி கொள்ள வேண்டும்.

இவ்வாறு அதில் கூறப்பட்டுள்ளது.