காஞ்சிபுரம் மாவட்டம், வாலாஜாபாத் பேரூராட்சியில் நடந்த கவுன்சிலர்கள் கூட்டத்திற்கு தி.மு.க., தலைவர் இல்லாமல்லி தலைமை வகித்தார்.

துணை தலைவர் சுரேஷ்குமார், பேரூராட்சி செயல் அலுவலர் லோகநாதன் ஆகியோர் முன்னிலை வகித்தனர். வரி வசூலிப்பாளர் சிவப்பிரகாசம் தீர்மானங்களை வாசித்தார்.

தி.மு.க., - அரிக்குமார்: பல்வேறு தெருக்களில் சாலை, கழிவுநீர் ஆகிய வசதிகள் இல்லாமல் உள்ளன. குடியிருப்புகள் இல்லாமல் இருக்கும், அங்கீகாரம் பெறாத வீட்டுமனை பிரிவு பகுதியில், 26 லட்ச ரூபாய் செலவில் ஏன் சிமென்ட் சாலை போட வேண்டும்.

செயல் அலுவலர் - லோகநாதன்: 2017ம் ஆண்டே அங்கீகாரம் பெறப்பட்டு உள்ளது. வீட்டு மனைப்பிரிவினர் வரியினங்களை செலுத்தி வருகின்றனர். அதனால், சாலை போட நிதி ஒதுக்கீடு செய்யப்பட்டுள்ளது.

தி.மு.க., - கலைவாணி: விளம்பரம் செய்த தீர்மானத்தை ரத்து செய்ய வேண்டும். விளம்பரம் தோடுவோர், தங்களின் சொந்த பணத்தில் தேடிக் கொள்ளலாம். பதவிக்கு வந்தவர்கள், சேவை மனப்பான்மையோடு சேவை செய்ய வேண்டும். சுய லாபம் அடைவதிற்கில்லை.

செயல் அலுவலர் - லோகநாதன்: வளர்ச்சி பணிகள் குறித்து தெரிய வேண்டும் என, விளம்பரம் கொடுக்கிறோம்.

தி.மு.க., - கலைவாணி: பேரூராட்சியில் தான்தோன்றி தனமாக சுற்றித்திரியும் மாடுகளை கட்டுப்படுத்த, அதன் உரிமையாளர்களுக்கு நோட்டீஸ் வழங்க வேண்டும்.

செயல் அலுவலர் - லோகநாதன்: மாட்டின் உரிமையாளர்களுக்கு முறையாக நோட்டீஸ் வழங்கப்பட்டு உள்ளது.

தி.மு.க., - அரிக்குமார்: பஜாரில் மாடுகள் தான்தோன்றிதனமாக சுற்றி திரிகின்றன. அதை கட்டுப்படுத்த நடவடிக்கை எடுக்க வேண்டும்.

செயல் அலுவலர் - லோகநாதன்: மாடு பிடிக்க அதிக பணம் செலவாகிறது. இருப்பினும், மாடு பிடித்து கோசாலையில் ஒப்படைக்க நடவடிக்கை எடுக்கப்படும்.

தி.மு.க., தனசேகரன்: நான்கு நாட்களாக மின் விளக்கு எரியவில்லை. பேரூராட்சி ஊழியர்களிடம் புகார் அளித்தும் நடவடிக்கை எடுக்கவில்லை.

செயல் அலுவலர் லோகநாதன்: சரி செய்ய நடவடிக்கை எடுக்கிறேன்.

வி.சி., - அசோக்குமார்: இருசக்கர வாகன நிறுத்தங்களில், தினசரி நுாற்றுக்கும் மேற்பட்ட வாகனங்கள் நிற்கின்றன. வருவாய் மட்டும் குறைவாக கணக்கு காட்டப்பட்டுள்ளது. பேரூராட்சி ஊழியர் பெறும் சம்பளத்தை விட குறைந்த வருவாய் கிடைக்கிறதே?

செயல் அலுவலர் - லோகநாதன்: அரசு வசூலிக்கும் போது, குறைந்த வருவாய் வருகிறது. தனியார் வசூலிக்கும்போது அதிகமான பணத்தை வசூலிக்கி முடிகிறது. நாங்கள் என்ன செய்ய முடியும்.

ம.தி.மு.க., - சிவசங்கரி: கழிவுநீர் கால்வாய் கட்டித்தர வேண்டும். சுகாதார கழிப்பறை கட்டடம் ஆகியவை பயன்பாட்டிற்கு வர வேண்டும் என, நான்கு மாதங்களாக மனு அளித்தும் நடவடிக்கை இல்லை.

செயல் அலுவலர் லோகநாதன்: நடவடிக்கை எடுக்கப்படும்.

தி.மு.க., துணை தலைவர் - சுரேஷ்குமார்: ஜே.சி.பி., வாகனத்திற்கு வழங்கிய நிதியில், ஒரு புதிய ஜே.சி.பி., இயந்திரமே வாங்கி விடலாம் போலிருக்கிறதே

செயல் அலுவலர் லோகநாதன்: எந்த நகர்ப்புற நிர்வாகத்திலும் சொந்த வாகனங்கள் வாங்குவதற்கு அனுமதி இல்லை.

தி.மு.க., - கருணாகரன்: நான்கு நாட்களாக தண்ணீர் வரவில்லை. கேட்வால்வு சரியாக திறப்பதில்லையா.

செயல் அலுவலர் - லோகநாதன்: சுழற்சி முறையில் தண்ணீர் வினியோகம் செய்து வருகிறோம். தடையின்றி வினியோகம் செய்ய நடவடிக்கை எடுக்கப்படும்.

தி.மு.க., - வெங்கடேசன்: கோடைகாலம் துவங்கி இருப்பதால், தற்போது வினியோகிக்கும் தண்ணீரை கூடுதலாக அரை மணி நேரம் வினியோகம் செய்ய வேண்டும்.

தி.மு.க., - கலைவாணி: பேரூராட்சியில், நாய்கள், குரங்குகள் தொல்லையாக உள்ளது. புளுகிராசிடம் கூறி பிடிக்க நடவடிக்கை எடுக்க வேண்டும்.

செயல் அலுவலர் - லோகநாதன்: புளுகிராசிடம் புகார் அளித்தும், அவர்கள் வர தயக்கம் காட்டுகின்றனர்.

இவ்வாறு கவுன்சிலரகள் கூட்டத்தில் விவாதம் நடந்தது.