உத்திரமேரூர் போக்குவரத்து பணிமனை கட்டுப்பாட்டில் இயக்கப்படும் பேருந்துகளில், உத்திரமேரூரில் இருந்து, காஞ்சிபுரம், அரக்கோணம் வழியாக திருத்தணிக்கு நேரடி பேருந்து சேவை இயக்கப்படுவதில்லை.

அதற்கு பதிலாக, உத்திரமேரூர் - காஞ்சிபுரம் வரையில் அரசு பேருந்துகள் இயக்கப்படுகின்றன. காஞ்சிபுரத்தில் இருந்து, மற்றொரு பேருந்து பிடித்து, அரக்கோணம் வழியாக, திருத்தணிக்கு செல்ல வேண்டி உள்ளது.

காஞ்சிபுரத்தில் இருந்து, திருப்பதிக்கு செல்லும் பேருந்துகளில், சில நடத்துனர்கள் திருப்பதி செல்பவர்களை ஏற்றிய பிறகே, திருத்தணி, அரக்கோணம் செல்லும் பயணியர்களை ஏற்ற அனுமதி அளிக்கின்றனர்.

இதனால், காஞ்சிபுரத்தில் இருந்து, திருத்தணி செல்லும் முதியவர்கள் மற்றும் மாற்றுத்திறனாளிகள் அரசு பேருந்தில் நின்றுக் கொண்டு பயணம் செய்ய வேண்டிய சூழல் உருவாகி உள்ளது.

எனவே, உத்திரமேரூரில் இருந்து, காஞ்சிபுரம், அரக்கோணம் வழியாக திருத்தணிக்கு நேரடி அரசு பேருந்து இயக்க வேண்டும் என, உத்திரமேரூர் சுற்றியுள்ள கிராமத்தினர் இடையே கோரிக்கை எழுந்துள்ளது.