காஞ்சிபுரம் அடுத்த, கீழ்கதிர்பூரில், நுாற்றாண்டை கடந்த அருணாசலேஸ்வரர் மற்றும் அகத்தீஸ்வரர் கோவில் உள்ளது.

பழமையான இக்கோவிலை, கிராமத்தினர், அறங்காவலர், விழாக்குழு சார்பில், சமீபத்தில் சற்று பெரிய அளவில் புதுப்பித்து கட்டினர். கும்பாபிஷேகத்தையொட்டி நேற்று முன்தினம், காலை 7:00 மணிக்கு கணபதி ஹோமத்துடன், யாகசாலை பூஜை துவங்கியது.

நேற்று, காலை 9:25 மணிக்கு கடம் புறப்பாடு நடந்தது. தொடர்ந்து, காலை 9:40 மணிக்கு கோவில் கோபுர விமான கலசம், பரிவாரங்களுக்கும், மூலவருக்கும் புனிதநீர் ஊற்றி கும்பாபிஷேகம் நடத்தி வைத்தனர்.

பசுமை இந்தியா தன்னார்வ அமைப்பினர், கும்பாபிஷேக விழாவில் பங்கேற்றவர்களுக்கு பழ வகை மற்றும் நிழல்தரும் பல்வேறு வகையான மரக்கன்றுகளை வழங்கினர்.

* காஞ்சிபுரம் தாயார் குளம் தெருவில் உள்ள செல்வஜோதி விநாயகர் கோவிலை புதுப்பித்து கும்பாபிஷேகம் நடத்த கோவில் நிர்வாகிகள், திருப்பணி குழுவினர், தாயார்குளம் தெருவினர் முடிவு செய்தனர். அதன்படி, பல்வேறு திருப்பணிகள் செய்து முடிக்கப்பட்டு, 34 ஆண்டுகளுக்குப்பின் நேற்று, காலை 8:30 மணிக்கு கும்பாபிஷேகம் நடந்தது.

* காஞ்சிபுரம் பல்லவர்மேடு கிழக்கு பகுதி, அன்னை சத்யா நகரில் முத்துமாரியம்மன் கோவில் உள்ளது. இக்கோவிலில் புதிதாக விநாயகர், பாலமுருகர், தட்சிணாமூர்த்தி, வாராஹி அம்மன், துர்கை அம்மன், பக்த ஆஞ்சநேயர் சிலைகள் பிரதிஷ்டை செய்யப்பட்டு நேற்று கும்பாபிஷேகம் விமரிசையாக நடந்தது. இரவு 7:00 மணிக்கு, அம்மன் வீதியுலா நடந்தது.

* காஞ்சிபுரம் அடுத்த திருப்பருத்திக்குன்றம் காலனியில் பாளையத்தம்மன் கோவில் கும்பாபிஷேகத்தையொட்டி திருப்பணிகள் செய்து முடிக்கப்பட்டு, நேற்று, காலை 11:00 மணிக்கு கோபுரம் மற்றும் பரிவார மூர்த்திகளுக்கு கும்பாபிஷேகம் நடந்தது.