உத்திரமேரூர் -- எண்டத்துார் சாலை, கம்மாளம்பூண்டியில் நீர்வரத்து கால்வாய் மீது, தரைப்பாலம் அமைக்கப்பட்டுள்ளது. இந்த பாலத்தின் வழியே சுற்றுவட்டார கிராமங்களைச் சேர்ந்த மக்கள், பல்வேறு பகுதிகளுக்கு தினமும் சென்று வருகின்றனர்.

இந்நிலையில், மழை நேரங்களில் கால்வாயில் அதிக நீர்வரத்து ஏற்பட்டு, தரைப்பாலத்தை மூழ்கியவாறு தண்ணீர் செல்கிறது. அப்போது, அவ்வழியே செல்லும் வாகன ஓட்டிகள் கடும் சிரமத்திற்கு உள்ளாகின்றனர்.

ஒவ்வொரு ஆண்டும் தரைப்பாலத்தின் மீது தண்ணீர் செல்லும்போது, இருபுறமும் மண் அரிப்பு ஏற்பட்டு அங்குள்ள சாலை சேதமடைந்து வருகிறது.

இவ்வழியே இரவு நேரங்களில் செல்லும் வாகன ஓட்டிகள், நிலைத்தடுமாறி சாலையோர பள்ளத்தில் விழுந்து, விபத்தில் சிக்கி வருகின்றனர். இதைத் தடுக்க, கம்மாளம்பூண்டியில் தரைப்பாலத்தை அகற்றிவிட்டு, மேம்பாலம் கட்ட நெடுஞ்சாலைத் துறையினர் நடவடிக்கை எடுக்க, வாகன ஓட்டிகள் வலியுறுத்தி வருகின்றனர்.