சென்னை - பெங்களூரு தேசிய நெடுஞ்சாலையை ஒட்டி, காரப்பேட்டை பகுதியில், காஞ்சிபுரம் வட்டார போக்குவரத்து அலுவலகம் இயங்கி வருகிறது. இங்கு, வாகனங்கள் பதிவு, உரிமம் புதுப்பித்தல், ஓட்டுநர் உரிமம், பழகுனர் உரிமம் ஆகிய பணிகள் மேற்கொள்ளப்படுகின்றன.

இதற்காக வானங்களுடன் ஏராளமானோர் வருகின்றனர். போதிய இடவசதி இல்லாததால், பொன்னேரிக்கரை - பரந்துார் சாலை காரப்பேட்டை பேருந்து நிறுத்தம் அருகே, வாகனங்களை நிறுத்த வேண்டி உள்ளது. சில ஆண்டுகளாக, சென்னை - பெங்களூரு தேசிய நெடுஞ்சாலை சர்வீஸ் சாலையோரம் நிறுத்த வேண்டி உள்ளது

தற்போது, சென்னை - பெங்களூரு நான்குவழி சாலை, ஆறுவழி சாலையாக விரிவுபடுத்தும் பணிக்கு போதிய இடவசதி இன்றி, வட்டார போக்குவரத்து அலுவலர்கள் பரிதவித்து வருகின்றனர்.

காஞ்சிபுரம் வட்டார போக்குவரத்து அலுவலகத்தில், இடவசதி பற்றாக்குறையை தீர்ப்பதற்கு, காஞ்சிபுரம் அடுத்த காரை கிராமத்தில், வட்டார போக்குவரத்து அலுவலகத்திற்கு, 2010ல் இடம் ஒதுக்கப்பட்டது.

அந்த இடத்தில், நீர்வரத்து கால்வாய் வருவதால், அங்கு வட்டார போக்குவரத்து அலுவலகம் அமைக்கும் பணி கைவிடப்பட்டது. இதற்கு மாற்று இடம் தேடி, 15 ஆண்டுகளுக்கும் மேல் வருவாய் துறையினரும், மாவட்ட அதிகாரிகளும் வலை வீசி தேடி வருகின்றனர்.

ஸ்ரீபெரும்புதுார்

இது ஒருபுறமிருக்க, ஸ்ரீபெரும்புதுார் வட்டார போக்குவரத்து அலுவலகத்திற்கு, 3 ஏக்கர் நிலம் ஒதுக்கியும், கட்டடம் கட்ட நிதி ஒதுக்காததால், நெருக்கடி கட்டடத்தில் இயங்க வேண்டிய சூழல் உள்ளது என, வட்டார போக்குவரத்து துறையினர் புலம்பி வருகின்றனர்.

எனவே, வட்டார போக்குவரத்து துறையினர் மற்றும் மாவட்ட நிர்வாகம் இணைந்து, வட்டார போக்குவரத்து அலுவலகங்களுக்கு இடம் தேர்வு செய்தும், நிதி ஒதுக்கி கட்டடம் கட்டவும் வழிவகை செய்ய வேண்டும் என, வாகன ஓட்டிகள் கோரிக்கை விடுத்துள்ளனர்.

இதுகுறித்து, காஞ்சிபுரம் வட்டார போக்குவரத்து அலுவலர் நாகராஜன் கூறியதாவது:

காரப்பேட்டை வட்டார போக்குவரத்து அலுவலகத்திற்கு, காரை கிராமத்தில் இடம் தேர்வு செய்யப்பட்டது. அந்த இடத்தை ஓட்டி, நீர்வரத்து கால்வாய் செல்வதால், கட்டடம் ஏதும் கட்டக்கூடாது.

அதற்கு பதிலாக வேறு ஒரு இடம் தேர்வு செய்து கொடுக்கிறோம் என, அரசு கூறியதால், திட்டம் கைவிடப்பட்டுள்ளது.

புதிய இடம் தேர்வு செய்து தரும்படி, மாவட்ட வருவாய் அலுவலருக்கு கடிதம் கொடுத்துள்ளோம். வருவாய் துறைதான் நிலம் ஒதுக்கி தர வேண்டும்.

இவ்வாறு அவர் கூறினார்.

எனக்கு தெரியலை
''காஞ்சிபுரம் வட்டார போக்குவரத்து அலுவலகத்திற்கு இடம் ஒதுக்கீடு தொடர்பான விபரம் எனக்கு தெரியாது. இம்மாவட்டத்திற்கு புதிதாக பொறுப்பேற்று இருப்பதால், நான் இங்கு வருவதற்கு முன், வட்டார போக்குவரத்து அலுவலகத்தினர் கடிதம் கொடுத்திருக்கலாம். இருப்பினும், ஆய்வு செய்து விட்டு தகுந்த நடவடிக்கை எடுக்கப்படும்.
- முருகேசன், வருவாய் அலுவலகம், காஞ்சிபுரம் மாவட்டம்.