இதுகுறித்து காஞ்சிபுரம் கலெக்டர் கலைச்செல்வி வெளியிட்ட செய்திக்குறிப்பு:

தமிழ் வளர்ச்சி துறையின் சார்பில், முன்னாள் முதல்வர் அண்ணாதுரை பிறந்த நாளை ஒட்டி, டிச., 1ம் தேதியன்றும், ஈ.வெ.ரா., பிறந்த நாளை ஒட்டி டிச., 4ம் தேதி, பள்ளி மற்றும் கல்லுாரி மாணவ - மாணவியருக்கு என, தனித்தனியே பேச்சு போட்டிகள், காஞ்சிபுரம், பி.டி.வி.எஸ்., உயர் நிலைப்பள்ளியில் நடைபெற உள்ளன.

இப்போட்டி, பள்ளி மற்றும் கல்லுாரி மாணவ - மாணவியருக்கு காலை 9:00 மணிக்கு தொடங்கி நடைபெறும்.

கல்லுாரி மாணவ - மாணவியருக்கான பேச்சு போட்டியில், கல்லுாரிக்கு 2 பேர் வீதமும், பள்ளி மாணவ - மாணவியருக்கான பேச்சு போட்டியில், பள்ளிக்கு ஒருவர் வீதமும் தேர்வு செய்து அனுப்ப வேண்டும்.

மேலும் 6ம் வகுப்பு முதல் பிளஸ் 2 வரை பயிலும் பள்ளி மாணவ- - மாணவியருக்கும், கல்லுாரி மாணவ - -மாணவியருக்கும் தனித்தனியே பேச்சு போட்டிகள் நடத்தப்பட உள்ளன.

மாணவர்கள் அனைத்து தலைப்புகளையும் தயார் செய்து வர வேண்டும். போட்டி நடைபெறும் நாளில் குலுக்கல் முறையில் தேர்ந்தெடுக்கும் தலைப்பையொட்டி பேச வேண்டும்.

இவ்வாறு அதில் கூறப்பட்டுள்ளது.