பல சிறப்புகள் பெற்ற இந்த கோவிலுக்கு, காஞ்சிபுரம், செங்கல்பட்டு, திருவள்ளூர், சென்னை உள்ளிட்ட பல்வேறு மாவட்டங்களில் இருந்து ஏராளமான பக்தர்கள் வந்து வழிபடுகின்றனர்.

கோவிலுக்கு வரும் பக்தர்கள் பெரும்பாலும் அரசு பேருந்து வாயிலாக வந்து செல்கின்றனர். இந்த நிலையில், ஸ்ரீபெரும்புதுார் -- சிங்கபெருமாள் கோவில் நெடுஞ்சாலையில் உள்ள வல்லக்கோட்டை பேருந்து நிறுத்தத்தில், பயணியர் நிழற்குடை வசதி இல்லை.

இதனால், கோவிலுக்கு வரும் பக்தர்கள் வெயில், மழையில் பேருந்திற்காக சாலையோரம் கால்கடுக்க காத்திருக்கும் அவலநிலை உள்ளது. முதியவர்கள், பெண்கள், குழந்தைகள் கடும் அவதியடைந்து வந்தனர்.

எனவே, தினமும் நுாற்றுக்கணக்கானோர் வந்து செல்லும் வல்லக்கோட்டை பேருந்து நிறுத்தத்தில், இருக்கை வசதியுடன் நிழற்குடை அமைக்க வேண்டும் என, பக்தர்கள், பயணியர் தொடர்ந்து கோரிக்கை விடுத்து வந்தனர்.

அதன்படி, ஸ்ரீபெரும்புதுார் சட்டமன்ற உறுப்பினர் நிதியின் கீழ், 10 லட்சம் ரூபாய் மதிப்பில், இருக்கை வசதியுடன் நிழற்குடை அமைக்க நிதி ஒதுக்கப்பட்டது. தற்போது, நிழற்குடை கட்டுமான பணிகள் துவங்கிய நிலையில், மார்ச் மாதம் இறுதிக்குள் கட்டுமான பணிகள் நிறைவடைந்து, பயன்பாட்டிற்கு திறக்கப்படும் என, அதிகாரிகள் தெரிவித்தனர்.