கரூர்;கரூர் மாவட்டம், புகழூர் காகித ஆலை விருந்தினர் மாளிகையில், கரூர் லோக்சபா தொகுதி பொது மேற்பார்வையாளர் ராகுல் அசோக்கை சந்தித்து, நேற்று மாலை புகார் மனு அளித்த மாவட்ட அ.தி.மு.க., செயலரும், முன்னாள் அமைச்சருமான விஜயபாஸ்கர், நிருபர்களிடம் கூறியதாவது:கரூர் பஞ்., யூனியன் பகுதிகளில், அ.தி.மு.க., வேட்பாளர் தங்கவேலு, நானும் பிரசாரம் செய்யும் போது, மணல் கடத்தல் கும்பல் டூவீலரில் வந்து பிரச்னை செய்தனர். அப்போது, அ.தி.மு.க.,வினரை சமாதானம் பேசி, அழைத்து சென்று விட்டேன். போலீசாரிடம் புகார் அளித்தும் நடவடிக்கை இல்லை. நெரூர், மல்லம்பாளையம், வாங்கல் உள்ளிட்ட ஐந்து இடங்களில் சட்ட விரோதமாக லாரிகளில் மணல் அள்ளுகின்றனர். அதன் மூலம் வரும் பணத்தை வைத்து கொண்டு, செலவு செய்து கரூர் பஞ்., யூனியனில் அதிக ஓட்டுகள் வாங்க தி.மு.க., முயற்சி செய்கிறது. அ.தி.மு.க., வேட்பாளர் தங்கவேல் மற்றும் நிர்வாகிகள் மீது போலீசார் வழக்குப்பதிவு செய்கின்றனர். ஆனால், காங்., வேட்பாளர் உள்ளிட்ட, தி.மு.க.,வினர் மீது வழக்கு போடுவதில்லை.