அரவக்குறிச்சி அருகே பள்ளப்பட்டி, பால மாரியம்மன் கோவில் பின்புறம் அமைந்துள்ள பகுதியில், மின் வாரியம் நிறுவியுள்ள, மின் கம்பிகளின் மீது செடி கொடிகள் அதிகளவில் படர்ந்துள்ளதால், அப்பகுதி மக்கள் அச்சத்தில் உள்ளனர்.

மழைக்காலம் என்பதாலும், செடி கொடிகள் துரிதமாக பரவி, மின்கம்பிகளை சுற்றியுள்ள நிலையில், எப்போது வேண்டுமானாலும் மின்கசிவு அல்லது தீ விபத்து ஏற்படும் அபாயம் இருப்பதாக பொதுமக்கள் தெரிவிக்கின்றனர்.

இப்பகுதியில், 20க்கும் மேற்பட்ட குடும்பங்கள் வசித்து வருகின்றன. குழந்தைகள் தவறுதலாக மின் கம்பத்தை தொட்டால் கூட பாதிப்பு ஏற்படலாம் என தெரிகிறது. எனவே, மின்கம்பிகள் மீது படர்ந்துள்ள செடி கொடிகளை உடனடியாக அகற்ற மின்வாரிய அதிகாரிகள் நடவடிக்கை எடுக்க வேண்டும் என, அப்பகுதி மக்கள் எதிர்பார்க்கின்றனர்.