கரூர், செப். 25--

''கோ- ஆப்டெக்ஸ் தீபாவளி விற்பனை, 60 லட்சம் ரூபாய் என இலக்கு நிர்ணயம் செய்யப்பட்டுள்ளது,'' என, கலெக்டர் தங்கவேல் தெரிவித்தார்.

கரூர் கோ- ஆப் டெக்ஸ் விற்பனை நிலையத்தில், தீபாவளி பண்டிகையை முன்னிட்டு சிறப்பு தள்ளுபடி விற்பனையை கலெக்டர் தங்கவேல், தொடங்கி வைத்து கூறியதாவது:

கோ- ஆப்டெக்ஸ் நிறுவனத்தில் தீபாவளி பண்டிகையை முன்னிட்டு மென் பட்டு புடவைகள் ஏராளமாக குவிந்துள்ளன. கோவை, மதுரை, பரமக்குடி, திருச்சி மற்றும் சேலம் பகுதிகளில் தயாராகும் அனைத்து ரக காட்டன் புடவைகள், புதிய வடிவமைப்பிலும் ஆர்கானிக் மற்றும் களம்காரி காட்டன் புடவைகள் குறைந்த விலையில் நேர்த்தியான வண்ணங்களிலும் உருவாக்கப்பட்டு விற்பனைக்கு வைக்கப்பட்டுள்ளன. தீபாவளி பண்டிகைக்கு கரூர் மாவட்டத்தில் உள்ள விற்பனை நிலையத்திற்கு, 60 லட்சம் ரூபாய் விற்பனை இலக்கு நிர்ணயிக்கப்பட்டுள்ளது. ஏற்றுமதி ரகங்களான வில்ட் மெத்தைகள், டேபிள் மேட், ஸ்கிரின் துணிகள், ஒரிஜினல் இலவம் பஞ்சினாலான மெத்தைகள், தலையணைகள் மற்றும் தலையணை உறையுடன் கூடிய படுக்கை விரிப்புகள் வாடிக்கையாளர்களிடையே பெரும் வரவேற்பை பெற்றுள்ளது. தீபாவளி பண்டிகையை முன்னிட்டு தமிழக அரசு கைத்தறி ரகங்களுக்கு, 30 சதவீதம் சிறப்பு தள்ளுபடி வழங்குகிறது. இவ்வாறு அவர் கூறினார்.நிகழ்ச்சியில் கோ-ஆப்டெக்ஸ் மண்டல மேலாளர் காங்கேயவேலு, துணை மண்டல மேலாளர் சுப்ரமணியன், கரூர் விற்பனை நிலைய மேலாளர் (பொறுப்பு) கதிர்வேல் உள்பட பலர் பங்கேற்றனர்.