குளித்தலை அடுத்த குமாரமங்கலம் பஞ்., ஆறாவது வார்டில், ஓராண்டாக குடிநீருக்காக போடப்பட்ட இரண்டு ஆழ்துளை குழாய்களில் பழுது ஏற்பட்டது. இதனால் பொதுமக்கள் பாதிக்கப்பட்டு வந்தனர். இப்பகுதி மக்களில் பலர், மேட்டுமருதுார் கிராமத்தில் பொது குடிநீர் பைப்பிலிருந்து தண்ணீர் எடுத்து பயன்படுத்தி வருகின்றனர்.

பழுது ஏற்பட்ட ஆழ்துளை குழாய்களை, சரி செய்து தட்டுப்பாடு இல்லாமல் குடிநீர் வழங்க வேண்டும் என, பஞ்., நிர்வாகத்திடம் இப்பகுதி மக்கள் பலமுறை மனு அளித்தும் நடவடிக்கை இல்லை.

இந்நிலையில் நேற்று காலை 11:00 மணியளவில் கோட்டைமேடு பெட்டவாய்த்தலை செல்லும், ராணி மங்கம்மாள் நெடுஞ்சாலையில் காலி குடங்களுடன் பெண்களும், ஆண்களும் சாலை மறியல் போராட்டத்தில் ஈடுபட்டனர்.

வி.ஏ.ஓ., விஜயா, ஒன்றிய ஆணையர் பாஸ்கர், பஞ்., செயலாளர் லெனின் ஆகியோர் போராட்டத்தில் ஈடுபட்ட மக்களிடம் பேச்சு வார்த்தை நடத்தினர். பழுது ஏற்பட்ட ஆழ்துளை குழாய்களை சரி செய்து, நாளை முதல் தட்டுப்பாடு இல்லாமல் குடிநீர் வழங்குவதாக உறுதி அளித்தனர். இதையடுத்து, பொதுமக்கள் சாலை மறியலை கைவிட்டனர்.

இதனால் இச்சாலையில் அரை மணி நேரம் போக்குவரத்து பாதிக்கப்பட்டது.