அரவக்குறிச்சியில், ஆறாம் வகுப்பு முதல் பத்தாம் வகுப்பு வரை அரசு மகளிர் உயர்நிலைப்பள்ளி கரூர் சாலையில் செயல்பட்டு வருகிறது. இங்கு, 500க்கும் மேற்பட்ட மாணவியர் படித்து வருகின்றனர். பிளஸ் 1 வகுப்பிற்கு, அரசு ஆண்கள் மேல்நிலைப் பள்ளியில் மாணவியர் சிலர் சேருகின்றனர்.

இது இருபாலர் பள்ளியாக உள்ளதால், அருகில் உள்ள பள்ளப்பட்டி பெண்கள் பள்ளியில் சேர்த்து விடுகின்றனர். சில பெற்றோர், தங்கள் குழந்தைகளை பத்தாம் வகுப்புடன் நிறுத்தி விடுகின்றனர். இதனால் மாணவியர் பிளஸ் 2 செல்ல இயலாமல் இடைநிற்றல் அதிகமாகி பெண்களின் கல்வி முன்னேற்றம் தடைபடுகிறது.

எனவே, அரசு பெண்கள் உயர்நிலைப் பள்ளியை, மேல்நிலைப் பள்ளியாக தரம் உயர்த்துவதன் மூலமாக, அனைத்து பெண் குழந்தைகளும் பிளஸ் 2 முடித்து தங்களுடைய உயர் கல்வியை தொடர்வதற்கு எளிமையாகவும், வசதியாகவும், பாதுகாப்பாகவும் இருக்கும் என பெற்றோர் கூறுகின்றனர்.