கிருஷ்ணகிரி மாவட்டம், பர்கூர் அடுத்த சிகரலப்பள்ளியை சேர்ந்த 102 வயது மூதாட்டி ராஜம்மாள், தன் மகன் கிருஷ்ணன் என்பவருடன் கிருஷ்ணகிரி மாவட்ட கலெக்டர் அலுவலகத்தில் நேற்று அளித்த மனுவில் கூறியிருப்பதாவது:

என் கணவர் முருகன், பல ஆண்டுகளுக்கு முன் இறந்து விட்டார். எனக்கு, ஐந்து மகள்கள், மூன்று மகன்கள். தந்தை வழி சொத்தாக எனக்கு, 1.28 ஏக்கர் நிலம் சிகரலப்பள்ளியில் உள்ளது. இதில், இளைய மகள் அம்சா, வீடு கட்ட, 3 சென்ட் நிலம் கேட்டார். கடந்த 1986ல் அந்த நிலத்தை தர நான் சம்மதித்தேன்.

ஆனால் அவர், எனக்கு தெரியாமல், 3 சென்ட்டுக்கு பதில் 27 சென்ட் நிலத்தை எழுதி வாங்கி விட்டார்.

மேலும், 49 சென்ட் நிலத்தையும் அபகரித்து விட்டார். என் சொத்தின் அசல் பத்திரத்தையும் பறித்து கொண்டார்.

தற்போது, என் சொத்துக்களை அனைத்து பிள்ளைகளுக்கும் பிரித்து கொடுக்க, பர்கூர் சார் - பதிவாளர் அலுவலகத்திற்கு சென்றபோது தான், என் இளைய மகள் அம்சா, அவரது கணவர் அருணாச்சலம் ஆகியோர், என்னை ஏமாற்றி நிலங்களை அபகரித்தது தெரிந்தது.

இதுகுறித்து விசாரித்து என்னிடமிருந்து அபகரிக்கப்பட்ட நிலங்களை மீட்டுத்தர வேண்டும். இவ்வாறு அதில் கூறியுள்ளார்.