விநாயகர் சதுர்த்தியையொட்டி, கிருஷ்ணகிரி புதுப்பேட்டை பழைய சப்-ஜெயில் சாலையிலுள்ள சித்தி விநாயகர் கோவிலில், நேற்று காலை, 6:00 மணிக்கு சிறப்பு பூஜை, விநாயகருக்கு, 608 லிட்டர் பால் அபிஷேகம் நடந்தது.

தங்கக்கவச அலங்காரத்தில் விநாயகர் அருள்பாலித்தார். இதே போல், கிருஷ்ணகிரி காந்திசாலை வரசித்தி விநாயகர், பழைய வீட்டு வசதி வாரிய குடியிருப்பு வரசித்தி விநாயகர், டான்சி வளாகம் செல்வ விநாயகர், கொத்தபேட்டா ஞான விநாயகர் ஆகிய கோவில்களில், தங்கக்கவச அலங்காரத்தில் விநாயகர் அருள்பாலித்தனர்.

அதேபோல், சேலம் சாலை ஆதிசக்தி விநாயகர் கோவில், பழையபேட்டை நேதாஜி சாலை சுந்தர விநாயகர் கோவிலில் வெள்ளிக்கவச அலங்காரத்திலும், லண்டன்பேட்டை டி.பி.லிங்க் சாலை வரசித்தி விநாயகர் கோவில்களில், காசு அலங்காரத்திலும், பர்கூர் வரசித்தி விநாயகர் கோவிலில் விபூதி அலங்காரத்திலும் சுவாமி அருள் பாலித்தார்.

காந்திநகர் வலம்புரி விநாயகர் கோவில், புதிய வீட்டு வசதி வாரியம் வினைதீர்த்த விநாயகர் கோவில், காவேரிப்பட்டணம் பேரூ அள்ளி காவாக்கரை தென்பெண்ணை ஆற்றங்கரையிலுள்ள பால தண்டாயுதபாணி கோவிலில், சிறப்பு அலங்காரத்தில் விநாயகர் அருள்பாலித்தார்.

இதேபோல், மாவட்டம் முழுவதுமுள்ள விநாயகர் கோவில்களில் நேற்று, சிறப்பு பூஜை மற்றும் வழிபாடு நடந்தது. அனைத்து விநாயகர் கோவில்களிலும் பக்தர்கள் கூட்டம் அதிகமாக இருந்தது.