கிருஷ்ணகிரி: கிருஷ்ணகிரி நகராட்சி, 13வது வார்டு ரயில்வே காலனியில், நகராட்சி துணைத்தலைவர் தி.மு.க.,வை சேர்ந்த சாவித்திரி கடலரசு மூர்த்தி கவுன்சிலராக உள்ளார். இங்கு, 700 வீடுகள் உள்ளன. இங்குள்ள சாக்கடை கால்வாய்கள் சீராக இல்லாததால், பல ஆண்டுகளாக கழிவுநீர் முறையாக வெளியேறுவதில்லை. மழைக்காலங்களில் மழை நீருடன் சேர்ந்து கழிவுநீரும் வீடுகளுக்குள் புகுந்து விடுகிறது. இது குறித்து அப்பகுதி மக்கள் பல முறை நகர்மன்ற துணைத் தலைவர், நகராட்சி நிர்வாகத்திடம் புகார் தெரிவித்தும், எந்த நடவடிக்கையும் இல்லை. நேற்று மாலை பலத்த மழையின்போது, ரயில்வே காலனியிலுள்ள பல வீடுகளில் மழை நீருடன் கழிவுநீரும் சேர்ந்து புகுந்தது. ஆத்திரமடைந்த அப்பகுதி மக்கள், காந்திசாலையில் மறியலில் ஈடுபட்டனர்.