கிருஷ்ணகிரி: கிருஷ்ணகிரி அருகே, கல்லுக்குறிக்கி பெரியஏரி மேற்கு கோடியிலுள்ள காலபைரவர் கோவிலில் நேற்று தேய்பிறை அஷ்டமியையொட்டி சிறப்பு பூஜை நடந்தது. காலை, 7:00 மணிக்கு, கணபதி ஹோமம், நவக்கிரக ஹோமம், மஹாலட்சுமி ஹோமம், காலபைரவ மஹா ஹோமம், பூர்ணாஹூதி, சிவலிங்கம் மற்றும் உற்சவ கால பைரவருக்கு சிறப்பு அபிஷேகம் மற்றும் பூஜை நடந்தது. வரும் ஜூலை, 12ல் கோவில் கும்பாபிஷேகம் நடக்க உள்ளதால், காலபைரவ சுவாமி மூலவர் உள்ள அறை சாத்தப்பட்டு, கோவிலுக்கு அருகில் சிவலிங்கம் மற்றும் உற்சவ காலபைரவர் வைத்து யாகம், சிறப்பு பூஜை நடந்தது. சிவலிங்க வடிவில் சிவன் சிறப்பு அலங்காரத்தில் அருள் பாலித்தார்.