மின்வாரியத்தில் தட்கல் திட்டத்தில் இலவச மின்சாரத்திற்கு விண்ணப்பிக்கும் விவசாயிகளுக்கு ரூ.2.50 லட்சம் 'டிமாண்ட் டிராப்ட்' பெற்று மின் இணைப்பு கொடுக்கப்படுகிறது.

இதில் விண்ணப்பித்தோரிடம் கீழையூர் உதவி மின்பொறியாளர், போர்மென் ஆகியோர் அரசுக்கு செலுத்தவும், மின் இணைப்பு கொடுக்கவும் விவசாயிகளிடம் தலா ரூ. 3 லட்சம் பெற்றுக்கொண்டு கம்பங்கள் ஊன்றி, இணைப்பும் கொடுத்து சில ஆண்டுகளாகிறது. இந்நிலையில் தற்போது முறையான அனுமதி பெறவில்லை எனக்கூறி விவசாயிகளின் மின் இணைப்பை மின்வாரிய அமலாக்க பிரிவு அதிகாரிகள் துண்டித்தனர்.

பாதிக்கப்பட்ட விவசாயிகள் சிலர் கூறியதாவது:

தென்னரசு: தட்கல் திட்டத்தில் மின் இணைப்பு வழங்க அதிகாரிகள், அரசுக்கு செலுத்த ரூ 2.50 லட்சம், மின் இணைப்பிற்கு ரூ.50 ஆயிரம் பெற்றுக்கொண்டு 2 ஆண்டுகளுக்கு முன் மின் இணைப்பு கொடுத்தனர். அதிகாரிகள் செய்த தவறுக்கு தற்போது எங்களுக்கு தண்டனை கொடுத்துள்ளனர்.

ரவிச்சந்திரன்: மின்கம்பத்தை ஊன்றி மின் இணைப்பை விவசாயிகள் தன்னிச்சையாக கொடுக்க முடியுமா. அதிகாரிகள் தவறு செய்வது வேலியே பயிரை மேய்வது போல் உள்ளதால் உயரதிகாரிகள் நேரில் ஆய்வு செய்து மீண்டும் மின் இணைப்பை கொடுக்க வேண்டும்.

திருப்பதி: தவறு செய்த அதிகாரிகள் மீது அமலாக்க பிரிவினர் விசாரணை நடத்தி தண்டனை வழங்குவதோடு அதிகாரிகளால் ஏமாற்றப்பட்ட விவசாயிகளுக்கு மின் இணைப்பை வழங்க வேண்டும்.

மின்வாரிய மேற்பார்வை கண்காணிப்பாளர் மங்களநாதன் கூறுகையில், விசாரித்து துறை ரீதியான நடவடிக்கை எடுக்கப்படும் என்றார்.