மதுரை: வருவாய்த்துறையினர் போராட்டம் நடத்துவதால் வி.ஏ.ஓ.,க்கள் நெற் பயிருக்கான அடங்கல் சான்றிதழ் வழங்கவில்லை. நெல் கொள்முதல் மையத்தில் நெல்லை எடை யிடவில்லை என விவசாயிகள் கலெக்டர் அலுவலக வளாகத்தில் போராட்டத்தில் ஈடுபட்டனர். விவசாயி தான் பயிர் சாகுபடி செய்துள்ளாரா என்பதற்கான அடங்கல் நெல்கொள்முதல் மையத்தில் கேட்கப்படும். வி.ஏ.ஓ., மூலம் அடங்கல் சான்றிதழ் கையால் எழுதித் தருவர். அதைக் கொண்டு சென்றபின் வி.ஏ.ஓ.,விடம் மீண்டும் சரிபார்த்து ஓ.டி.பி., எண் பெற்ற பின்பே நெல் எடையிடப்படும். வி.ஏ.ஓ.,க்கள் தொடர் போராட்டத்தால் ஒவ்வொரு மையத்திலும் 3000 மூடைகளுக்கு மேல் தேங்கி கிடக்கிறன. களம் முழுவதும் நெல் மூடையால் நிரம்பி கிடக்கிறது. நெல்லை எடையிட்டு பணத்தைப் பெற முடியாமல் தினமும் காத்திருக்கிறோம். மாநிலம் முழுவதும் இப்பிரச்னை உள்ளதாக தமிழ்நாடு விவசாயிகள் சங்க மாவட்ட செயலாளர் இளங்கோவன், மேற்கு ஒன்றிய செயலாளர் நாகேந்திரன் தெரிவித்தனர்.