சங்கத் தலைவர் வேல்சங்கர், கவுரவ செயலாளர் சாய் சுப்ரமணியம், கவுரவ ஆலோசகர் ஜெயப் பிரகாசம் கூறியதாவது:

ஜி.எஸ்.டி., வரிவிதிப்பின் கீழ் அப்பளத்திற்கு வரிவிலக்கு அளிக்கப்பட்டுள்ளது. அதே வகையைச் சேர்ந்த வற்றல், வடகத்திற்கு வரி விதிக்கப்படுகிறது. ஈர இட்லிமாவு, வெல்லம், கருப்பட்டி, வற்றல், வடகத்திற்கு முழு வரிவிலக்கு அளிக்கவேண்டும். கற்பூரத்திற்கான 18 சதவீதத்தை 5 சதவீதமாக குறைக்க வேண்டும்.

காகித மூலப்பொருளுக்கு 18 சதவீத வரி, அதன் மூலம் தயாரிக்கப்படும் அட்டைப்பெட்டி, நோட்டு புத்தகத்திற்கு 5 சதவீத வரி என உள்ளது. அதை சரிசெய்து காகிதத்திற்கான வரியை 5 சதவீதமாக குறைக்க வேண்டும். களிமண் செங்கல்லுக்கு உள்ளீட்டு வரியுடன் 5 சதவீத வரி விதிக்க வேண்டும். ஒரே கடையில் வைத்து விற்கப்படும் உரத்திற்கு 5 சதவீதம், பூச்சிக்கொல்லி மருந்திற்கு 18 சதவீதம் என வேறுபாடாக உள்ளது. இதையும் 5 சதவீதமாக குறைக்க வேண்டும்.

தமிழகம், புதுச்சேரியை உள்ளடக்கிய ஜி.எஸ்.டி., குறைதீர் கமிட்டியில் தமிழ்நாடு உணவுப் பொருள் வியாபாரிகள் சங்க பிரதிநிதியையும் சேர்த்துள்ளதை வரவேற்கிறோம். இந்த கமிட்டி கூட்டத்தில் வரிப்பிரச்னை குறித்து மத்திய அரசுக்கு தெரியப்படுத்துவோம் என்றனர்.