பேரையூர் வட்டார பகுதியில் கடந்த வாரம் பெய்த மழையால் விளைநிலங்களில் தண்ணீர் தேங்கி பயிர்களுக்கு சேதம் ஏற்பட்டது. இதை தோட்டக்கலைத்துறையினர் உதவி இயக்குனர் தலைமையில் ஆய்வு செய்தனர். அப்போது மழைக்காலங்களில் சின்ன வெங்காய பயிரில் திருகல் நோயினால் ஏற்படும் பாதிப்புகளை தவிர்க்க விவசாயிகளுக்கு ஆலோசனை வழங்கினர்.

உதவி இயக்குனர் கூறியதாவது: நோயின் தாக்கம் தென்பட்டவுடன் கார்பன்டாசிம் அல்லது மேங்கோசெப் பூஞ்சானா கொல்லியை 2.5 கிராம் ஒரு லிட்டர் தண்ணீர் அளவில் கலந்து 15 நாட்கள் இடைவெளியில் இரண்டு முறை தெளிக்க வேண்டும். நோயை கட்டுப்படுத்த வெங்காய நடவுக்கு முன் அடியுரமாக வேப்பம் புண்ணாக்கு ஒரு ஹெக்டேருக்கு 100 கிலோ தொழு உரத்தோடு கலந்து ஆங்காங்கே இட வேண்டும் என்றனர்.