மதுரை மண்டேலா நகரில் மார்ச் 1ல் தே.ஜ., கூட்டணி கட்சிகளின் சார்பில் நடக்கும் பொதுக்கூட்டத்தில் பங்கேற்க வரும் பிரதமர் மோடி, மாலையில் திருப்பரங்குன்றம் கோயிலில் சுவாமி தரிசனம் செய்ய வருகிறார். அதற்காக பிரதமரின் சிறப்பு பாதுகாப்பு அதிகாரிகள் குழுவினர் நேற்று மதியம் திருப்பரங்குன்றம் கோயிலுக்கு வந்தனர் .

அவர்கள் கோயில் மூலஸ்தானம் வரை சென்று, பிரதமர் கோயிலுக்குள் நுழையும் பாதை, சுவாமி தரிசனம் முடித்து வெளியேறும் பாதை கோயிலுக்குள் செல்லும் பாதை படிக்கட்டுகள் ஆகியவற்றை 20 நிமிடங்களுக்கு மேல் ஆய்வு செய்தனர். போலீஸ் கமிஷனர் லோகநாதன், கோயில் துணை கமிஷனர் ஞானசேகரன், கண்காணிப்பாளர்கள் ரஞ்சனி, சுமதி, சத்யசீலன், பா.ஜ., மாநில பொதுச்செயலாளர் ராம சீனிவாசன், மாநில செயலாளர் கதலி நரசிங்கபெருமாள் உடன் சென்றனர்.

பொதுக்கூட்ட மேடையிலும் ஆய்வு: மண்டேலா நகர் பகுதியில் பொதுக்கூட்டம் நடைபெறும் இடத்தில் அமைக்கப்பட்டு வரும் மேடை, மற்ற பணிகளை பிரதமரின் சிறப்பு பாதுகாப்பு படையினர், தேசிய பாதுகாப்பு படையினர் ஆய்வு மேற்கொண்டனர். பின்னர் தமிழக வெடிகுண்டு தடுப்பு பிரிவினர் சோதனை மேற்கொண்டனர். மோப்பநாய் வரவழைக்கப்பட்டு சோதனை செய்யப்பட்டது.